Բրյուսովը՝ Ֆիզկուլտինստիտուտի ու Մանկավարժականի հետ․ բուհերի միավորման գաղափարը դասադուլի պատճառ է դարձել․ ՏԵՍԱՆՅՈՒԹ

Այսօր Վալերի Բրյուսովի անվան պետական համալսարանի ուսանողները դասադուլ էին անում։ Նրանք դեմ են Կրթության, գիտության, մշակույթի և սպորտի նախարարությունում շրջանառվող այն նախագծին, ըստ որի՝ Բրյուսովի անվան համալսարանն ու Հայաստանի Ֆիզիկական կուլտուրայի և սպորտի պետական ինստիտուտը կարող են միավորվել Խաչատուր Աբովյանի անվան Հայկական պետական մանկավարժական համալսարանի հետ։

«Չենք հասկանում՝ այդ որոշումը որտեղից է գալիս, ով է այն կայացրել և ինչի համար։ Մենք չենք ստանում մեզ հուզող հարցերի պատասխանը՝ ի վերջո, ո՞ւր է տանելու այս միավորումը, որքանո՞վ է այն նպաստելու կրթական գործընթացին, որքանո՞վ է օգուտ տալու հենց մեզ՝ ուսանողներիս։ Մենք պետք է պայքարենք հանուն այն բանի, որ մեր կարծիքը հաշվի առնվի»,- ասում է Բրյուսովի անվան համալսարանի 2-րդ կուրսի մագիստրոս Լիդա Հարությունյանը։

Նույն բուհի 4-րդ կուրսի ուսանող Էդգար Զատիկյանն էլ պնդում է՝ օպտիմալացումը կարող է կրթական համակարգին ձեռնտու լինել, սակայն ընտրված մեթոդաբանությունն է անհասկանալի․ «Արդյո՞ք հաշվի առնվել է Մասնագիտական կրթության որակի ապահովման ազգային կենտրոնի գնահատականը բուհերի գործունեության վերաբերյալ․ Բրյուսովի անվան համալսարանը շատ ավելի մեծ առավելություններ ունի, քան նույն Մանկավարժական համալսարանը»։

Վ․Բրյուսովի անվան համալսարանի Սոցիալական գիտությունների և սերվիսի ֆակուլտետի դեկան Ցոլակ Ակոպյանը պատմում է՝ երեկ Հոգաբարձուների խորհրդի նիստի ժամանակ, երբ քննարկվել է ռեկտորի ընտրության մրցույթ հայտարարելու հարցը, օրակարգի հաստատմանը դեմ են եղել Կառավարության ներկայացուցիչները՝ պատճառաբանելով, որ այս պահին քննարկվում է բուհերի միավորման նախագիծը։

Վարչապետ Նիկոլ Փաշինյանը դեռևս սեպտեմբերին էր հայտարարել Աշտարակում ակադեմիական քաղաք ստեղծելու և 8 բուհ թողնելու՝ կառավարության նախագծի մասին։ Ցոլակ Ակոպյանի խոսքով՝ անհասկանալի է, թե 90 տարվա ավանդույթ ունեցող բուհը, որը տարիների ընթացքում ապացուցել է, որ մրցակցային է դաշտում, ինչո՞ւ պետք է միավորվի այլ բուհերի հետ։

Ակցիայից հետո Բրյուսովի անվան պետական համալսարանում տեղի է ունեցել հանդիպում բուհի ղեկավարության, պրոֆեսորադասախոսական կազմի, ուսանողների և Հայաստանի փոխվարչապետ Համբարձում Մաթևոսյանի օգնական Գևորգ Բարսեղյանի միջև։ Նա ուսանողներին հորդորել է այլևս դասադուլի չդիմել։ Փոխվարչապետի օգնականը խոստացել է բրյուսովցիների մտահոգությունը փոխանցել պատկան մարմիններին։ Համալսարանի ղեկավարությունը պահանջել է միջնորդել և կազմակերպել հանդիպում ԿԳՄՍ նախարարի և փոխվարչապետի հետ։

Ինչ վերաբերում է Կրթության, գիտության, մշակույթի և սպորտի նախարարությանը, այնտեղից Factor TV-ին տեղեկացրին, որ պատրաստվում են թեմայի շուրջ պաշտոնական հայտարարություն տարածել։

Մանրամասները՝ տեսանյութում։

Աննա Բաբաջանյան