Ընտրացուցակների հետ կապված բոլոր կասկածները պետք է դուրս գան օրակարգից․ ԿԸՀ նախագահի թեկնածու․ ՏԵՍԱՆՅՈՒԹ

Ժողովրդավարությունը ՀՀ-ի համար ունի կենսական նշանակություն, և վերջին տարիներին ՀՀ-ում տեղի ունեցած զարգացումները ողջ աշխարհի կողմից բնորոշվում են որպես ժողովրդավար։ Այս մասին այսօր ԱԺ 8-րդ գումարման 4-րդ նստաշրջանի արտահերթ նիստում հայտարարեց ՔՊ-ի կողմից ԿԸՀ նախագահի պաշտոնում առաջադրված թեկնածու Վահագն Հովակիմյանը։

Հիշեցնենք, որ օրեր առաջ Հովակիմյանը, որը եղել է նաև ԱԺ պետաիրավական հարցերի հանձնաժողովի նախագահի տեղակալ, հրաժարականի դիմում է ներկայացրել ԱԺ նախագահին, նաև դուրս եկել ՔՊ կուսակցությունից, ինչպես օրենքն է պահանջում։

«ՀՀ-ն ընթանում է ժողովրդավարության զարգացման ճանապարհով, ինչն այսօր միջազգայնորեն արձանագրված փաստ է։ Այդ զարգացման համար անկյունաքարային է ազատ, արդար, թափանցիկ ընտրությունների կայացումը։ Եթե դա չկա, ուրեմն չի կարող լինել ժողովրդավարություն։ Կյանքի վերջին 24 տարում պայքարել, գործել եմ, որպեսզի ՀՀ-ում ընտրությունները լինեն ազատ և թափանցիկ, որովհետև միայն այդպես է հնարավոր ունենալ ժողովրդավարական երկիր»,- հայտարարեց Վահագն Հովակիմյանը։

Նրա խոսքով՝ արդար, թափանցիկ ընտրությունների դեմ ցանկացած ոտնձգությունը ՀՀ-ի դեմ ոտնձգություն է։ Ըստ Հովակիմյանի՝ 25 տարում ՀՀ ընտրական համակարգն անընդհատ զարգացել է, իսկ վերջին տարիներին ՝առավել քան առաջընթաց է ապրել շնորհիվ ՀՀ քաղաքացիների, ՀՀ-ում գործող քաղաքական ուժերի, դիտորդական առաքելությունների, ԿԸՀ-ի․ «Վերջին տարիներին ընտրական համակարգի հանդեպ վստահությունը էական բարձրացել է։ Օրենսդիր մարմնի ջանքերը պետք է ուղղված լինեն այդ վստահության բարձրացմանը, իսկ ընտրական համակարգի բարեփոխումները պետք է անընդհատ լինեն»։

ԿԸՀ նախագահի թեկնածուի կարծիքով՝ ընտրական բարեփոխումների առանցքում պետք է շարունակի մնալ գործընթացի թափանցիկության ամրապնդումը, որպեսզի քաղաքացին չկասկածի, թե իր քվեն կարող է կորել, որ իր քվեով է որոշվելու, թե քաղաքական ուժերից որն ինչպիսի ներգրավվածություն է ունենալու պետության կառավարման գործում։

«Մյուսն ընտրական համակարգի թվայնացման շարունակականությունն է։ Քաղաքացիների համար այն ավելի մատչելի պետք է լինի։ 3-րդ խնդիրը, որը հնարավոր է լուծել օրենսդրական լուրջ բարեփոխումներով, ընտրական ցուցակների շուրջ բանավեճի հանգուցալուծումն է։ Այն կարող է լինել պետական կառավարման համակարգի թվայնացման շնորհիվ, որպեսզի դրա արդյունքում հնարավոր լինի ճշգրտել ընտրական ցուցակները»,- նշեց Հովակիմյանը՝ ընդգծելով, որ բարեփոխումների տրամաբանությունը պետք է միտված լինի նրան, որ ընտրացուցակների հետ կապված բոլոր կասկածները դուրս գան օրակարգից։

Մանրամասները՝ տեսանյութում։