14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Ինչպե՞ս է Երևանի քաղաքապետարանը փորձում լվանալ ձեռքերն ու քաղաքացիների ուղեղը. ՏԵՍԱՆՅՈՒԹ
Տնտեսություն
29.05.2018 | 18:53
Մայիսի վերջին օրերին Երևանում տեղացած անձրևները մայրաքաղաքի որոշ հատվածներում ջրհեղեղի վերածվեցին: Պատճառն այն է, որ մայրաքաղաքի որոշ հատվածներում ջրատարները լավ չեն գործում, որոշ վայրերում էլ ընդհանրապես չկան: Քաղաքացիների դժգոհություններին ի պատասխան՝ Երևանի քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանը ֆեյսբուքյան էջում գրեց, թե՝ «… Մայրաքաղաքում անձրևաջրերի և, ընդհանրապես, ջրահեռացման, ինչպես նաև ջրամատակարարման համակարգերի սպասարկումը Երևանի քաղաքապետարանի գործառույթը չէ»։
Այսքանը, և ոչ մի խոսք այն մասին, թե ինչ են անում, որպեսզի պատկան կառույցները նորմալ աշխատեն: Մայիսի 24-ին ՀՀ ոստիկանությունն աղաղակող խախտում հայտնաբերեց. Երևանի քաղաքապետարանն ամեն տարի հայտարարում է «Թափառող կենդանիների (շների) ստերջացման և պատվաստման ծառայությունների» մատուցման մրցույթ, որն ավանդաբար հաղթում է «Յունիգրաֆ-Իքս» ՍՊԸ-ն՝ տարեկան ստանալով մոտ 100 միլիոն դրամ: 2016-18 թվականներին հիշյալ ընկերությունը ստացած 267 միլիոն դրամից 187 մլն-ը յուրացրել է: Գործունեությունն էլ վերահսկել է Երևանի քաղաքապետարանի աշխատակազմի առևտրի և սպասարկումների վարչությունը: Քաղաքապետ Տարոն Մարգարյանը մեկնաբանում է, թե իրենց կղմից պատշաճ վերհսկողություն է եղել: Արթուր Գևորգյանն էլ հայտնում է, թե «… Յունիգրաֆ-Իքս» ընկերության հաշվապահական խնդիրները չեն ներառվում վարչության գործառույթների կամ լիազորությունների մեջ»:
Այսինքն՝ քաղաքապետարանը մեկ շաբաթվա մեջ երկրորդ անգամ է մայրաքաղաքի համար կարևոր խնդրի հետ կապված դիտորդի կարգավիճակ ստանձնում: Այնինչ, եթե հաշվարկվում է, որ նման ծառայություններ իրականացնելու համար անհրաժեշտ է 267 մլն դրամ, բայց պարզվում է, որ ծախսվել է 82 մլն դրամ, ուրեմն կամ անորակ, փնթի ծառայություն է մատուցվել կամ՝ նախնական հաշվարկը ուռճացված է ներկայացվել: Երկու դեպքում էլ քաղաքապետարանը պատասխանատու է։ Ու հարց է առաջանում՝ այսպես ձեռքերը լվանալով ուր է հասնելու քաղաքապետարանը: Բնականաբար, քաղաքապետարանը պետք է տարբեր մասնավոր և իր ենթակայության հիմնարկների պատվիրակի ծառայություններ: Բայց եթե պետք է հատկացվող գումարի 70 տոկոսը գրպանվի, հասարակ անձրևը մայրաքաղաքը դարձնի Վենետիկ, քաղաքապետարանն էլ որպես պատասխանատու հղում անի տարբեր մասնավոր հիմնարկների, էլ Տարոն Մարգարյանի աշխատանքն ո՞ւմ է պետք:
Սևակ Հակոբյան
