Ոչ ոք պատրաստ չէ ճանաչել ԼՂ անկախությունը կամ ճանաչել որպես Հայաստանի մաս. Փաշինյան․ ՏԵՍԱՆՅՈւԹ

Լեռնային Ղարաբաղի հարցի կարգավորման վերաբերյալ Մոսկվան, Բրյուսելն ու Վաշինգտոնն արդյոք ունենք իրենց սեփական փաթեթը։ Հանրային հեռուստաընկերությանը տված հարցազրույցում վարչապետ Նիկոլ Փաշինյանն անդրադառնալով այս հարցին՝ նշեց․ «Չի կարելի ասել, որ  յուրաքանչյուրն իր սեփական փաթեթն ունի, բայց յուրաքանչյուրը որոշակի պատկերացում ունի:

Եթե ինձ վրա պարտավորություն է դրված ժողովրդի հետ խոսել  ճշմարտության լեզվով, ես պիտի արձանագրեմ հետևյալը՝ այդ երկրներից ոչ մեկը պատրաստ չէ ճանաչել Ղարաբաղի անկախությունն ու ոչ մեկը պատրաստ չէ Ղարաբաղը ճանաչել որպես Հայաստանի մաս: Նրանք, գուցե, մի քիչ  այլաբանորեն, գուցե, մի քիչ դիավանագիտորեն, երբեմն՝  շատ ուղիղ ասել են  դրա մասին ու մենք  պետք է այս փաստի հետ առերեսվենք»։

Արցախն Ադրբեջանի կազմում ճանաչելուն պատրա՞ստ են, դա՞ է իրենց առաջարկը։ Այս հարցին ի պատասխան՝ Փաշինյանն արձագանքեց․ «Գիտեք՝ այդ  երկրների մեջ եղել է հայտարարություն, որոնք ասել են, որ, ըստ էության, միջազգային առումով Լեռնային Ղարաբաղը Ադրբեջանի մաս է, եղել է այդ հայտարարությունը հրապարակային․ դրանք նորությո՞ւն են»։

Հարցին, թե ինչպիսին են նրանց առաջարկները խաղաղության պայմանագրի մասով, այսինքն՝ Հայաստան – Ադրբեջան հարաբերությունների լուծումների մասով առաջարկները, վարչապետը պատասխանեց․ «Գիտեք, խաղաղության պայմանագրի մասով, ըստ էության ․․․ ցանկացած երկու երկրի միջև խաղաղության պայմանագիր ունի մի քանի անկյունաքարային դրույթներ։ Հիմա ենթադրենք ասում են՝ Ադրբեջանի հինգ առաջարկներ, այդ պոստուլատները Ադրբեջա՞նն է հորինել։ Ոչ, դրանք միջազգայնորեն ընդունված այն բանաձևերն են, որոնց հիման վրա երկրները խաղաղության պայմանագրեր են կնքում։ Ես չեմ ասում, որ խաղաղության բոլոր պայմանագրերը նույնական են, բայց, ըստ էության, միջազգայնորեն ընդունված սահմանների, տարածքային ամբողջականության ճանաչում, սուվերենության հարգում, ուժի չկիրառում, ուժի սպառնալիքի չկիրառում և այլն։ Հիմա այդ սկզբունքները, ամեն դեպքում, ձևակերպվում են, այդ ձևակերպումները հարյուր տոկոսով նույնական չեն, բայց արտահայտում են, ըստ էության, նույն իմաստը»։

Մանրամասն՝ տեսանյութում։