Պատերազմից երկու տարի անց. ծնվել է հերոսացած Էրիկ Գևորգյանի քույրը. ՏԵՍԱՆՅՈւԹ

44-օրյա պատերազմում զոհված Էրիկ Գևորգյանի ծնողները որդուն կորցնելուց երկու տարի անց կրկին ծնող են դարձել։ 1 կգ 900 գրամ քաշով, 45 սմ հասակով ծնված Մանեն ընտանիքի 4-րդ երեխան է։ Սպասված մանկան ճիչը Գևորգյանների ընտանիքի խինդն ու սփոփանքն է։

Փոքրիկը, ասում են, Էրիկին է նման։ Ամեն անգամ նրան նայելիս նաև որդուն են հիշելու՝ ընդգծում է տիկին Լիլիթը։

Կյանքը հայրենիքին զոհաբերած Էրիկը զրահամեքենայի մեխանիկ վարորդ էր, 44-օրյա պատերազմի ժամանակ Հադրութում էր։ Ծառայակից ընկերների հետ մի քանի օր շրջափակման մեջ է եղել, հետո դուրս են բերվել շրջափակումից, բայց մի քանի օր անց Էրիկը զոհվել է անօդաչու թռչող սարքի հարվածից։ Էրիկի անունը սկզբում եղել է գերեվարվածների ցուցակում, հետո արդեն՝ անհետ կորածների։ Շուրջ մեկ տարի ծնողները հույսը չէին կորցնում, որ կգտնեն իրենց որդուն։

«Ամուսնուս հետ Արցախ գնացինք, փնտրեցինք, բայց․․․»,- ասում է 40-ամյա Լիլիթը։

Միայն 2021-ի օգոստոսի 18-ին՝ դեպքից 10 ամիս անց է ԴՆԹ անալիզի պատասխանով հաստատվել, որ Էրիկը զոհվել է։ Ծառայության ավարտին 3 ամիս էր մնացել։ Ամբողջ ընթացքում որդին հուսադրել է, թե ամեն ինչ լավ է լինելու. նրանից  վերջին զանգը հոկտեմբերի 14-ին են ստացել։

«Ասաց՝ մա՛մ ջան, ես լավ եմ, հետո կզանգեմ ուշոտ, մեռնեմ քեզ»,- պատմում է տիկին Լիլիթը։

Հիմա նա տղայի վերջին խոսքերով վզնոց է կրում, մյուս կողմում՝ Էրիկի լուսանկարն է։

«Էրեբունի ԲԿ»-ում նորածին Մանեին հարազատներն էին սպասում, հայրն ամենաշատն էր հուզված։

Մանեին ԲԿ-ից ոչ թե տուն, այլ եղբոր մոտ՝ «Եռաբլուր» տարան։ Գևորգյանների միակ ցանկությունն այն է, որ իրենց փոքրիկն ապրի խաղաղ երկնքի տակ, որ տարիներ անց էլ Մանեն հպարտանա հանուն հայրենիքի նահատակված եղբորով ու նրա մասին պատմի բոլորին։

Մանրամասները՝ տեսանյութում։

Արփի Հակոբյան