Հետևողականություն չի ցուցաբերվել․ եթե քաղաքապետարանը թերացել է՝ մեղադրում եմ․ Խաժակյան․ ՏԵՍԱՆՅՈՒԹ

«Սխալ է սլաքներն ուղղել քաղաքապետարանին՝ այն պարզ պատճառով, որ արտակարգ իրավիճակը կառավարվել է տեղում, ինչ-որ խնդիրներ լուծվել են, շենքը մնացել է այդպես կիսավեր վիճակում, և պարզ է եղել, որ այն փլուզվելու է»,- լրագրողների հետ ճեպազրույցում այս կարծիքը հայտնեց Երևանի ավագանու «Լույս» խմբակցության ղեկավար Դավիթ Խաժակյանը՝ անդրադառնալով  օրերս Սուրմալուի պատի փլուզմանը։

«Եվ, եթե այսօր էլ շարունակությունը չապամոնտաժվի՝ նոր փլուզումներ լինելու են: Այդ շենքը տվյալ պարագայում մասնավոր սեփականության տիրույթում է, բայց կարծում եմ, որ այս կամ այն կերպ ԱԻՆ-ի կողմից պետք է լինի հստակ ցուցում՝ շենքը ապամոնտաժելու: Եվ պետք չէ որևէ այլ կառույցի մատնանշել: Եթե մենք հասկանում ենք, որ դա փլուզվող շենք է, գիտեմ նաև, որ իրավական գործընթացներ կան, և այդ շենքը համարվում է իրեղեն ապացույց, ամեն դեպքում դա չի կարող խոչընդոտ հանդիսանալ՝ այն չապամոնտաժելու համար: Այն մի՛ դեպքում կարող է չապամոնտաժվել, եթե ամբողջությամբ սահմանազատված է»,- մանրամասնեց Խաժակյանը՝ հավելելով, որ քաղաքում կան շատ այլ, ոչ սեյսմակայուն, փլուզման վտանգի տակ եղած մասնավոր շենքեր, պետք է քաղաքապետարանին դիմեն քանդման համար, քանի որ քաղաքապետարանը մասնավոր տարածքում քանդման գործառույթ ունեցող մարմին չէ:

«Ես կարծում եմ, որ իշխանական համակարգում թիվ մեկ խնդիրը հենց այդ պատասխանատվության պինգ-պոնգն է: Մի կառույցը գցում է մյուսի վրա: Եթե նույնիսկ քաղաքապետարանն այդտեղ ունի թերացում, մեղադրանքն ուղղում եմ նաև քաղաքապետարանին: Դա խոսում է այն մասին, որ մարդիկ, ովքեր որևէ գործառույթ են իրականացրել՝ պատասխանատու կերպով չեն մոտեցել, հետևողականություն չեն ցուցաբերել: Մեր պետության կառավարչական համակարգի հիմնական պրոբլեմը պատասխանատվության զգացման պակասն է ու վարչարարական պինգ-պոնգը»,- ընդգծեց Խաժակյանը:

Մանրամասները՝ տեսանյութում։