Ադրբեջանի ագրեսիայի հետևանքով դասապրոցեսը դադարեցրած դպրոցներն այսօրվանից կվերսկսեն աշխատանքը․ ՏԵՍԱՆՅՈՒԹ

Ադրբեջանի սանձազերծած ռազմական ագրեսիայի հետևանքով ոտնահարվել է Հայաստանի Գեղարքունիքի, Վայոց ձորի, Սյունիքի մարզերի 25 հազար աշակերտի կրթական իրավունքը: «Ռազմական գործողությունների հետևանքով կրթության իրավունքի ոտնահարումը, ստեղծված պայմաններում կրթական գործընթացների կազմակերպումը» թեմայով ասուլիսում այս մասին նշեց ՀՀ կրթության, գիտության, մշակույթի, սպորտի նախարարի տեղակալ Ժաննա Անդրեասյանը տեղեկացրեց, որ  նշված մարզերի որոշ բնակավայրերում եղավ անվտանգային այնպիսի իրավիճակ, որ երեխաները զրկվեցին կրթության իրավունքից, կրթության շարունակականությունն ապահովելու հնարավորությունից: Խոսքը թե՛ դպրոցական, թե՛ նախադպրոցական հաստատությունների մասին է:

«Նշված երեք մարզում նախադպրոցական հաստատություն հաճախող ավելի քան 6 հազար երեխա ևս զրկվել է կրթության շարունակականությունն ապահովելու հնարավորությունից: Նախորդ ամբողջ շաբաթն այս բնակավայրերում արձակուրդ է եղել: Այսինքն՝ չեն գործել ուսումնական հաստատությունները: Հետագայում բաց թողնված դասերը կլրացվեն: Կապի մեջ լինելով մարզային մեր գործընկերների հետ՝ ասեմ, որ ունենք որոշում և այսօրվանից արդեն դպրոցները կվերականգնեն իրենց աշխատանքը»,- նշեց Անդրեասյանը՝ հավելելով, որ այն դպրոցներում, որտեղ կա անվտանգության ապահովման տեսանկյունից հնարավորություն, կրթությունը կկազմակերպվի առկա եղանակով: Մյուս բնակավայրերում գործընթացը կկազմակերպվի հեռավար:

Փոխնախարարի խոսքով՝ Գեղարքունիքում հեռավար կրթությունը կվերսկսվի 12 դպրոցում, որոնք հիմնականում Վարդենիսի տարածաշրջանում են,  Վայոց ձորում՝ 3 դպրոցում, Սյունիքի մարզում՝ 112 դպրոցում: Այստեղ միայն 5 դպրոցում առկա ուսուցումը կվերականգնվի: Նախարարի տեղակալը նշեց, որ իրավիճակի զարգացումն հաշվի առնելով՝ յուրաքանչյուր օր նոր որոշումներ կկայացվեն:

«Դպրոցները կուտակել են հեռավար ուսուցման մեծ փորձառություն, ցավոք ոչ միայն քովիդի համավարակի պայմաններում: 2020 թվականի աշնանը պատերազմի ժամանակ առաջին օրերից սահմանամերձ համայնքներում անցում էինք կատարել հեռավար ուսուցման, ապահովել էինք անհրաժեշտ սարքավորումներ: Կարծում ենք, որ դպրոցների՝ հեռավար կրթություն կազմակերպելու կարողությունները բավարար են»,- նշեց Անդրեասյանը:

Մանրամասները՝ տեսանյութում։