20.11.2024 | 20:18
Արևմուտքի հետ լարվածության ֆոնին Պուտինը դադարել է ներկայանալ հանրությանը
Ռուսաստանում Հայաստանը փորձում են ներկայացնել արևմտամետ երկիր, իսկ Արևմուտքում՝ ռուսամետ․ Նիկոլ Փաշինյան. ՏԵՍԱՆՅՈՒԹ
Քաղաքականություն
07.09.2022 | 13:22
Այն մարտահրավերները, որոնք արդեն երկար ժամանակ գոյություն ունեն մեր տարածաշրջանում, առաջին հերթին կապված են անվտանգության հետ։ Վլադիվոստոկում անցկացվող Արևելյան տնտեսական ֆորումում ունեցած ելույթում այս մասին ասաց ՀՀ վարչապետ Նիկոլ Փաշինյանը։
«Երբ ամբողջ միջազգային հանրության, հատկապես՝ Հայաստանի ռազմավարական դաշնակից ՌԴ-ի ուշադրությունն անվտանգության ոլորտում շատ կենտրոնացած է Ուկրաինայում իրավիճակի վրա, կան կոնկրետ մտահոգություններ, որ դա կարող է հանգեցնել իրավիճակի ապակայունացման մեր տարածաշրջանում։ Վերջին տարիներին, գիտեք, որ 2020 թվականին մենք պատերազմ եք վերապրել։ Իրավիճակը նման է նրանով, որ երբ Ադրբեջանը սկսեց պատերազմը, միջազգային հանրության ուշադրությունը, այդ թվում՝ ՌԴ-ի, կենտրոնացած էր կորոնավիրուսի համավարակի խնդիրների վրա։ Մենք հուսով ենք, որ ՌԴ-ի և մեր գործընկերների հետ սերտ համագործակցությամբ կկարողանանք կառավարել իրավիճակը և այն պահել վերահսկողության տակ, ինչը կարևոր է նաև գլոբալ անվտանգության համար»,- ասել է Նիկոլ Փաշինյանը։
Նա նաև նշել է, որ Ռուսաստանում Հայաստանը փորձում են ներկայացնել արևմտամետ երկիր, իսկ Արևմուտքում՝ ռուսամետ, ինչն արվում է Հարավային Կովկասն ապակայունացնելու համար։
«Կան ուժեր, որոնք շատ մեծ էներգիա են ծախսում, որ Հայաստանը Մոսկվայում ներկայացնեն որպես արևմտամետ կառավարությամբ երկիր, իսկ Եվրոպայում և Արևմուտքում՝ որպես խիստ ռուսամետ երկիր, և դա որպես գործոն օգտագործել՝ տարածաշրջանում ապակայունացումն արդարացնելու համար»,- ասել է Փաշինյանը։
Հայաստանի վարչապետը նաև նշել է, որ «աշխարհի բոլոր երկրները, բոլոր կառավարությունները խաղաղություն և կայունություն են ուզում»։
«Խնդիրն այն է, որ յուրաքանչյուրն ունի խաղաղության ու կայունության իր պատկերացումը։ Վերջին տարիներին շատ տարածված է «բազմաբևեռություն» արտահայտությունը, և թվում է, որ դրանում կա կոնսենսուսային ինչ-որ բան։ Խնդիրն այն է, որ բոլորն էլ յուրովի են հասկանում «բազմաբևեռությունը»։ Պետք է ինչ-որ կերպ փորձել մերձեցնել պոտենցիալ «բազմաբևեռության» մասնակիցների տեսակետները»,- ասել է Փաշինյանը։
Էմմա Չոբանյան
