Պուտինը սպառնացել է սահմանափակել Ուկրաինայից հացահատիկի արտահանումը

Ռուսաստանի նախագահ Վլադիմիր Պուտինը հայտարարել է, որ մտածում է ուկրաինական նավահանգիստներից հացահատիկի արտահանումը սահմանափակելու մասին, գրում է BBC-ի ռուսական ծառայությունը։

«Մենք ամեն ինչ արեցինք, որպեսզի ուկրաինական հացահատիկը արտահանվի: Մենք դա արեցինք Թուրքիայի հետ միասին: Եթե Թուրքիան բացառենք որպես միջնորդ երկիր, ապա Ուկրաինայից արտահանվող գրեթե ողջ հացահատիկն ուղարկվում է ոչ թե զարգացող ամենաաղքատ երկրներ, այլ ԵՄ երկրներ»,- ասել է Պուտինը՝ ելույթ ունենալով Վլադիվոստոկի Արևելյան տնտեսական ֆորումում։

Պուտինը պնդում է, որ 87 նավերից միայն 2-ն են բեռնված ՄԱԿ-ի Պարենի համաշխարհային ծրագրի շրջանակում:

«Ինչպես եվրոպական շատ երկրներ վերջին տասնամյակներում և դարերում հանդես են եկել որպես գաղութատերեր, այդպես էլ շարունակում են գործել այսօր: Եվս մեկ անգամ նրանք պարզապես խաբեցին զարգացող երկրներին և շարունակում են խաբել»,- ասել է Պուտինը։

Նա հավելել է, որ այս մոտեցմամբ զարգացող երկրներում պարենային խնդիրները միայն կաճեն, ինչը կարող է հանգեցնել «աննախադեպ հումանիտար աղետի»։

«Գուցե մենք պետք է մտածենք, թե ինչպես սահմանափակել հացահատիկի և առևտրային պարենամթերքի արտահանումն այս ճանապարհով, ես անպայման կխորհրդակցեմ այդ հարցով Թուրքիայի նախագահ Էրդողանի հետ»,- հավելել է Պուտինը։

Նշենք, որ պատերազմից առաջ ուկրաինական հացահատիկը կազմում էր համաշխարհային արտահանման մոտ 10%-ը, իսկ ՄԱԿ-ը նախազգուշացրել էր, որ դրա լիակատար անհետացումը միջազգային առևտրային շղթաներից կարող է աղքատ երկրներում հանգեցնել սովի: Ամենից շատ ուկրաինական ցորենից են կախված Մոլդովան, Լիբանանը, Կատարը, Թունիսը, Պակիստանը։

Տաթև Ֆռանգյան