Մոսկվայի դատարանը հիմա էլ «Նովայա ռասսկազ-գազետայի» գրանցումն է չեղարկել

Մոսկվայի Բասմանի դատարանը սեպտեմբերի 6-ին չեղարկել է «Նովայա գազետա»-ի խմբագրության նախագծի՝ «Նովայա ռասսկազ-գազետա»-ի գրանցման վկայականը, որը հրապարակվում էր «Նովայա գազետա»-ի հրապարակման դադարեցումից հետո։ Համապատասխան հայցը ներկայացրել է «Ռոսկոմնադզոր»-ը։ Գերատեսչության պնդումները վերաբերում էին նրան, որ 2009 թվականին գրանցված հրատարակության առաջին համարը լույս է տեսել 2022 թվականի հուլիսին։ Ընդ որում, միայն այս տարվա մայիսի վերջին «Ռոսկոմնադզոր»-ը մոնիթորինգի ժամանակ հաստատել է, որ ամսագիրը երկար ժամանակ չի տպագրվել, գրում է DW-ի ռուսական ծառայությունը։

Իր հերթին, խմբագրության ներկայացուցիչը դատարանին է տրամադրել հրապարակման մի քանի օրինակ, մասնավորապես՝ օգոստոսյան համարը։ Նա նաև ասել է, որ «Ռոսկոմնադզոր»-ին հուլիսի 1-ին ծանուցվել է պլանավորված հուլիսյան թողարկման մասին, և որ իշխանությունները որևէ պատճառ չունեն լրատվամիջոցի գրանցումն անվավեր ճանաչելու համար։

Նախօրեին էլ «Ռոսկոմնադզոր»-ի պահանջով չեղարկվել էր «Նովայա գազետայի» տպագիր տարբերակի լիցենզիան, որը տրվել է 2006թ.։ Հայցի հիմքում 2006թ. խմբագրության հիմնադրի փոփոխոթյունն էր։ Միաժամանակ, նշվել է, որ «Նովայա գազետա»-ն կանոնադրություն չի ներկայացրել «Ռոսկոմնադզոր»-ին, ինչպես պահանջում է «Զանգվածային լրատվության մասին» օրենքը։ Իր հերթին, խմբագրակազմի պաշտպանությունը նշում էր, որ «Նովայա գազետան» սկսել է հրատարակվել 2002 թվականին, իսկ չորս տարի անց խմբագրությունում աննշան փոփոխություններ են եղել, որոնք չեն պահանջում գրանցման համար նոր կանոնադրություն ներկայացնել:

Մարտին՝ Ուկրաինա Ռուսաստանի լայնածավալ ներխուժման մեկնարկից օրեր անց, «Նովայա գազետա»-ն հայտարարեց, որ դադարեցնում է թերթի հրապարակումը իր կայքում, սոցիալական ցանցերում և տպագիր օրինակով՝ մինչև ուկրաինական պատերազմի ավարտը: Հրատարակությունն այս որոշումը բացատրել էր նրանով, որ երկրորդ նախազգուշացումն է ստացել «Ռոսկոմնադզոր»-ից, ինչի պատճառով «թերթը չի կարող շարունակել աշխատանքը»։

Ռուսաստանը լքած «Նովայա Գազետա»-ի լրագրողները սկսել են «Նովայա գազետա. Եվրոպա» արտասահմանյան նախագիծը, իսկ Ռուսաստանի Դաշնությունում մնացած խմբագրական խորհրդի անդամները սկսել են հրատարակել «Նովայա ռասսկազ-գազետա»-ն։

Տաթև Ֆռանգյան