20.02.2026 | 02:07
Ադելիա Պետրոսյանը մեդալ չնվաճեց ձմեռային Օլիմպիական խաղերում
Բաքուն, Երևանը և Մոսկվան առաջընթաց են գրանցել պայմանավորվածությունների ձեռքբերման հարցում․ Լավրով
Քաղաքականություն
31.08.2022 | 17:19
Ադրբեջանի, Հայաստանի և Ռուսաստանի ներկայացուցիչներից բաղկացած եռակողմ աշխատանքային խումբը զգալի առաջընթաց է գրանցել Հարավային Կովկասում տրանսպորտային հաղորդակցությունների ապաշրջափակման խնդրի շուրջ պայմանավորվածությունների ձեռքբերման հարցում։ Այս մասին հայտարարել է ՌԴ ԱԳ նախարար Սերգեյ Լավրովն իրանցի գործընկեր Հոսեյն Ամիր Աբդոլլահիանի հետ բանակցություններից հետո կայացած մամուլի ասուլիսում, գրում է ՏԱՍՍ-ը։
«Հարավային Կովկասում առևտրատնտեսական և տրանսպորտային կապերի ապաշրջափակման հարցերով զբաղվում է եռակողմ խումբը՝ Ռուսաստանի, Ադրբեջանի և Հայաստանի փոխվարչապետների մասնակցությամբ։ Այն աշխատում է ռիթմիկ։ Ի դեպ, Ադրբեջանի և Հայաստանի սահմանի սահմանազատման վերաբերյալ հանդիպումներով, հենց օրերս տեղի ունեցան կանոնավոր շփումներ։ Այս եռակողմ աշխատանքային խումբը, որը ստեղծվել է երեք ղեկավարների 2020 թվականի նոյեմբերի 9-ի որոշմամբ, զգալի առաջընթաց է գրանցել պայմանավորվածությունների ձեռքբերման հարցում։ Հուսով եմ՝ դրանք կձևակերպվեն շատ մոտ ապագայում։ Ամենակարևորն այն է, որ այս աշխատանքն իրականացվում է ոչ թե վակուումում, ոչ մեկուսացված, այլ ավելի լայն տրանսպորտային նախագծերի, այդ թվում՝ Հյուսիս-Հարավ միջանցքի նախագծի հետ սերտ համատեղությամբ, որով շահագրգռված են նաև մեր իրանցի գործընկերները»,- ասել է Լավրովը:
Լավրովի խոսքով՝ իրանցի պաշտոնակցի հետ քննարկումը վերաբերել է Ադրբեջանի, Իրանի և Ռուսաստանի միջև Ռեշտ-Աստարա մայրուղու փոքր երկաթուղային հատվածի վերականգնման շուրջ ընթացող քննարկումներին։
«Սեպտեմբերին արդեն ծրագրված են մասնագետների շփումներ։ Այսպիսով, ինձ թվում է, գործնական առումով գործընթացը շատ ու շատ առաջատար է, բայց ինչ վերաբերում է դրա համաշխարհային և տարածաշրջանային նշանակությանը, այն նաև կայանում է մատակարարման շղթաների կառուցման մեջ, որոնք անկախ կլինեն այն երկրներից, որոնք ոչ պատշաճ վերաբերմունք են ցուցաբերում այս տարածաշրջանում իրենց գործընկերների շահերի նկատմամբ՝ լինի դա Իրանը, լինի Ռուսաստանի Դաշնությունը, թե որևէ այլ երկիր»,- ասել է Լավրովը։
Իր հերթին, Ամիր Աբդոլլահիանը նշել է, որ Իրանն ունի շատ արտոնյալ աշխարհաքաղաքական դիրք։
«Տարանցիկ ուղիների ամրապնդումը, այդ թվում՝ Հյուսիս-Հարավ դիվերսիֆիկացված գծերը, ընկալում ենք որպես այս տարածաշրջանի զարգացման, ինչպես նաև պարենային անվտանգության կարևոր գործոն»,- հավելել է նա։
Իրանի ԱԳ նախարարը նաև հայտնել է Թեհրանի պատրաստակամությունը՝ ավարտին հասցնելու Ռեշտ-Աստարա անավարտ հատվածի շինարարությունը։
Տաթև Ֆռանգյան
