Համաշխարհային տնտեսական աճը դանդաղում է․ ԱՄՀ

Արժույթի միջազգային հիմնադրամը հայտարարել է համաշխարհային տնտեսական աճի դանդաղման և դրա արագ վերականգնման մռայլ հեռանկարների մասին, գրում է VOA-ն։

ԱՄՀ-ն ակնկալում է, որ համաշխարհային տնտեսական աճը, որն անցյալ տարի կազմել է 6,1%, այս տարի կկազմի 3,2%՝ 0,4 տոկոսային կետով պակաս, քան ապրիլյան կանխատեսումը։

«2021 թ. տատանվող վերականգնմանը հաջորդեց 2022-ի տխուր զարգացումը, քանի որ ռիսկերը սկսեցին նյութականանալ», – ասվում է ԱՄՀ տարածած հայտարարության մեջ:

«Համաշխարհային արտադրությունն այս տարվա երկրորդ եռամսյակում նվազել է Չինաստանում և Ռուսաստանում տեմպերի դանդաղման պատճառով, իսկ ԱՄՆ սպառողական ծախսերը չեն համապատասխանում ակնկալիքներին»:

Վաշինգտոնում գործող միջազգային ֆինանսական գործակալությունը հայտարարել է, որ «համաճարակի պատճառով արդեն թուլացած համաշխարհային տնտեսությունը մի քանի ցնցում է ապրել»: Դա գնաճն է, որը սպասվածից ավելի բարձր է եղել ամբողջ աշխարհում, բայց հատկապես ԱՄՆ-ում և եվրոպական խոշոր երկրներում, Չինաստանում աճի տեմպերի դանդաղումը ՝ COVID-19-ի բռնկումների և արգելափակումների պատճառով, որոնք, պարզվում է, նույնպես սպասվածից ավելի ուժեղ են եղել, ինչպես նաև Ուկրաինայում ռուսական պատերազմի բացասական հետեւանքները։

ԱՄՀ-ն հայտարարել է, որ սպառողական ապրանքների, հատկապես սննդի և էներգիայի գներն ամբողջ աշխարհում աճում են։

Այս տարի ակնկալվում է, որ զարգացած տնտեսություններում աճը կկազմի 6,6%, զարգացող երկրներում՝ 9,5%։ Երկու թվերն էլ մոտ 0,1 տոկոսային կետով բարձր են ԱՄՀ-ի նախորդ կանխատեսումից։

Տաթև Ֆռանգյան