19.08.2026 | 17:38
Ֆերան Տորեսը «Բարսելոնայի» 5-րդ ամենաթանկ վաճառքն է. ՏԵՍԱՆՅՈՒԹ
Էրդողանի ընտրողների 40 տոկոսից ավելին նշել է, որ իրենց կենսամակարդակը վատացել է
Քաղաքականություն
27.07.2022 | 12:02
Թուրքիայի քաղաքացիների մոտ 72,6 տոկոսը նշել է, որ իրենց տնտեսական վիճակը վերջին մեկ տարում վատթարացել է։ Այս մասին ասվում է Metropoll Research-ի կողմից անցկացված նոր հարցման արդյունքներում, գրում են թուրքական լրատվամիջոցները։
«Վերջին տարում ինչպե՞ս է փոխվել ձեր կամ ձեր ընտանիքի կենսամակարդակը» հարցին, մասնակիցների 72,6 տոկոսը պատասխանել է՝ վատացել է, իսկ 9,9 տոկոսը՝ բարելավվել: 17,2 տոկոսն ասել է, որ այն չի փոխվել։ Պատասխանները վերլուծվել են նաև կուսակցական հատկանիշով, այսինքն՝ թե որ՞ կուսակցության օգտին են քվեարկած եղել հարցման մասնակիցները։
Նախագահ Ռեջեփ Թայիփ Էրդողանի ղեկավարած իշխող Արդարություն ու զարգացում կուսակցության ընտրողների 40,8 տոկոսը հայտնել է, որ իրենց կենսամակարդակը վատացել է, մինչդեռ Ազգայնական շարժում կուսակցության MHP ընտրողների համար այս ցուցանիշը կազմել է 58,1 տոկոս։
Հիմնական ընդդիմադիր Ժողովրդահանրապետական կուսակցության ընտրողների համար այս ցուցանիշը կազմել է 90,6 տոկոս, իսկ ազգայնական ընդդիմադիր İYİ կուսակցության դեպքում՝ 84,9 տոկոս։
Հավելենք, որ հունիսին Թուրքիայում գնաճը պաշտոնական տվյալների համաձայն հասել է վերջին երկու տասնամյակի ամենաբարձր մակարդակին՝ 78,62 տոկոսի։ ENAG Inflation Research Group-ի տվյալների համաձայն՝Թուրքիայում սպառողական գների տարեկան գնաճը 2021-ի հունիսից իրականում կազմել է 175 տոկոս, ինչը պաշտոնապես հրապարակված թվից կրկնակի ավելի է։
Էմմա Չոբանյան
