ԱՄՆ հաշվետվողականության գրասենյակի ներկայացուցիչները Factor TV-ի գրասենյակում էին․ քննարկվեցին ՀՀ Հաշվեքննիչ պալատի գործունեությանը վերաբերող հարցեր

Factor TV-ի գրասենյակում այսօր ՀՀ հաշվեքննիչ պալատի նախաձեռնությամբ տեղի է ունեցել հանդիպում-քննարկում ԱՄՆ հաշվետվողականության գրասենյակի ներկայացուցիչների և Factor TV-ի աշխատակիցների մասնակցությամբ։

Հանդիպմանը ներկա են եղել GAO-ի աուդիտի գերազանցության կենտրոնի ավագ փորձագետ Ժանետ Ֆրանզելը, GAO-ի հաղորդակցության փորձագետ Ջուդի Ինգլնդ-Ժոզեֆը, GAO-ի ֆինանսական աուդիտոր Վիլյամ Քորդրին, Factor TV-ի ֆինանսական տնօրեն Անահիտ Սողոմոնյանը, Factor TV-ի լրագրողներ։

Հանդիպման նպատակն էր վեր հանել ՀՀ Հաշվեքննիչ պալատի գործունեությանն առնչվող խնդիրները, լսել մեդիաոլորտի ներկայացուցիչների տեսակետն ու համապատասխան առաջարկություններ անել Հաշվեքննիչ պալատի գործունեության արդյունավետության բարձրացման ուղղությամբ։ Քննարկման ժամանակ անդրադարձ է եղել նաև Հաշվեքննիչ պալատի արտաքին հաղորդակցությանը, հաշվեքննությունների արդյունքներին։

ԱՄՆ հաշվետվողականության գրասենյակի ներկայացուցիչները անդրադարձել են նաև ամերիկյան գրասենյակի կատարած աշխատանքին ու փորձին։ Առաջարկներ են հնչել Հաշվեքննիչ պալատի գործունեության թափանցիկության, աշխատանքի լուսաբանման առանձնահատկությունների վերաբերյալ։ ԱՄՆ հաշվետվողականության գրասենյակի ներկայացուցիչներն ընդգծել են Հաշվեքննիչ պալատի ուսումնասիրությունների մատչելության և հասարակության հետ հաղորդակցության մակարդակի բարձրացման կարևորությունը։ Կարևորվել է քաղհասարակության և մեդիա կազմակերպությունների դերը աշխատանքի արդյունավետության բարձրացման հարցում։

Factor TV-ի լրագրողները հարցեր են ուղղել Հաշվեքննիչ Պալատի գործունեության, ԱՄՆ-ում համանման կառույցի աշխատանքի, լրագրողների հետ համագործակցության վերաբերյալ։

Ընդգծվել է Հաշվեքննիչ պալատի աշխատանքի ավելի ակտիվ լուսաբանման, հասարակության համար ավելի մատչելի ներկայացման անհրաժեշտությունը։ Լրագրողները ներկայացրել են Հաշվեքննիչ պալատի գործունեության լուսաբանման փորձն ու արել առաջարկներ։

Անժելա Պողոսյան