Ուրսուլա ֆոն դեր Լեյենը ողջունել է գազի սպառումը նվազեցնելու՝ ԵՄ երկրների որոշումը

Եվրահանձնաժողովի ղեկավար Ուրսուլա ֆոն դեր Լեյենը ողջունել է գազի սպառումը նվազեցնելու ԵՄ երկրների որոշումը։ Այս մասին ասված է նրա պաշտոնական հայտարարության մեջ, որը հրապարակվել է երեքշաբթի՝ հուլիսի 26-ին։

«Այսօր ԵՄ-ն վճռական քայլ է կատարել՝ հակազդելու (Ռուսաստանի նախագահ Վլադիմիր) Պուտինի կողմից գազի մատակարարումների ամբողջական դադարեցման սպառնալիքին», – ասել է ֆոն դեր Լեյենը։
Նա նշել է, որ Եվրահանձնաժողովի առաջարկի հիման վրա ԵՄ խորհրդի կողմից ռեկորդային ժամանակում ձեռք բերված քաղաքական համաձայնությունը կապահովի գազի սպառման կանոնավոր և համակարգված կրճատում՝ նախապատրաստվելով գալիք ձմռանը։

«15%-ով կրճատելու հավաքական հանձնառությունը շատ կարևոր է և կօգնի ձմռանն ընդ առաջ լրացնել մեր պահեստարանները: Ավելին, ԵՄ-ում արտակարգ էներգետիկ վիճակ հայտարարելու հնարավորությունը, որը կհանգեցնի անդամ երկրներում գազի սպառման հարկադիր կրճատմանը, հզոր ազդանշան է, որ ԵՄ-ն կանի հնարավոր ամեն ինչ՝ ապահովելու մատակարարման անվտանգությունը և պաշտպանելու  սպառողներին՝ լինեն  տնային տնտեսություններ, թե արդյունաբերություն»,- ասել է Եվրահանձնաժողովի նախագահը։

Նրա խոսքով՝ «Գազպրոմի» հայտարարությունը՝ առանց հիմնավոր տեխնիկական պատճառի «Հյուսիսային հոսք-1» գազատարով գազի մատակարարումների կրճատման մասին ևս մեկ անգամ ցույց է տալիս Ռուսաստանի  վստահելի չլինելը։

Հիշեցնենք, որ հուլիսի 26-ին ԵՄ էներգետիկայի նախարարները քաղաքական համաձայնություն են ձեռք բերել այս ձմռանը գազի սպառման կամավոր կրճատման վերաբերյալ:

Ծրագիրը ներառում է սպառման 15%-ով կրճատում, ինչպես նաև որոշակի բացառություններ հատկապես խոցելի երկրների համար։

Տաթև Ֆռանգյան