ԵՄ տարածքի գրեթե կեսին երաշտ է սպառնում. Եվրահանձնաժողով

Եվրամիությունում տարածքի 46%-ը գտնվում է երաշտի վտանգի տակ, իսկ հողատարածքի 11%-ն արդեն զգում է հողի խոնավության պակաս։ Այս մասին ասված է Եվրահանձնաժողովի համատեղ հետազոտական կենտրոնի՝ 2022 թվականի «Երաշտը Եվրոպայում» զեկույցում։

«Կլիմայական փոփոխությունները աշխարհում մեծացնում են լուրջ երաշտի ու անտառային հրդեհների վտանգը։ Համատեղ հետազոտական կենտրոնը գիտությունն ու տեխնոլոգիաները կիրառում է կլիմայական փոփոխությունների ուսումնասիրության համար։ Այս զեկույցի շնորհիվ մենք ավելի լավ ենք պատկերացնում իրավիճակը, որպեսզի պաշտպանենք մեր անտառները, բերքը և ջրերը»,- ասել է ԵՀ գիտական հետազոտությունների պատասխանատու անդամ Մարիա Գաբրիելը։

Զեկույցում նշվում է, որ խոնավության պակասն ու բարձր  ջերմային ֆոնը հանգեցնում է բերքատվության նվազման նախորդ կանխատեսումների համեմատ։ Երաշտն, ամենայն հավանականությամբ, կազդի Իսպանիայի, Իտալիայի, Պորտուգալիայի, Ռումինիայի և Ֆրանսիայի գյուղատնտեսության վրա։ Որոշակի ազդեցություն կկրեն նաև Հունգարիայի, Գերմանիայի, Լեհաստանի, Սլովենիայի և Խորվաթիայի գյուղատնտեսական մթերք արտադրողներին։

Իտալիայի հինգ շրջաններում ջրի պակասը հանգեցրել է մի շարք մունիցիպալիտետներում դրա օգտագործման սահմանափակումների։ Ջրի խնայողության նմանատիպ միջոցառումներ են ձեռնարկվել նաև Ֆրանսիայում։ Գիտնականները զգուշացրել էին, որ 21-րդ դարավերջին Եվրոպայում երաշտները կդառնան ավելի հաճախակի և ինտենսիվ։

Տաթև Ֆռանգյան