09.10.2026 | 15:23
ԱԱԾ-ն հերքում է Մեղրիում ադրբեջանցիների լինելու լուրը // Ադրբեջաներեն երգ՝ Փաշինյանի տեսանյութում․ ԼՈՒՐԵՐ
Թուրքիայի երիտասարդների 80 տոկոսը չի քվեարկելու Էրդողանի «Արդարություն ու զարգացում» կուսակցության օգտին․ հետազոտություն
Քաղաքականություն
11.07.2022 | 23:30
Թուրքիայի Z սերնդի ներկայացուցիչների մոտ 80 տոկոսը, որոնք ծնվել են 2000 թվականից հետո, ասում են, որ չեն քվեարկի իշխող «Արդարություն և զարգացում» կուսակցության օգտին։ Թուրքական լրատվամիջոցների հաղորդմամբ՝ այս մասին ասվում է Gezici Research ընկերության ուսումնասիրության մեջ:
Z սերնդի ներկայացուցիչները կազմելու են Թուրքիայի ընտրող չափահաս բնակչության 11,8 տոկոսը մինչև 2023 թվականի հունիսը կայանալիք ընտրությունները:
«Նրանք հավանություն չեն տալիս քաղաքական գործիչների թելադրող, իշխող ու կոպիտ լեզվին»,- ասել է ընկերության նախագահ ու միջազգային անվտանգության հարցերի փորձագետ Մուրատ Գեզիջին։
Նա նշել է, որ երիտասարդների ճնշող մեծամասնությունն իր ձայնը տալու է ընդդիմադիր «Ազգային դաշինքին», եթե նախագահական ընտրություններն անցնեն երկրորդ փուլ։
«Որովհետև նրանք իշխանությունը տեսնում են ավելի ճնշող և վերահսկող»,- ասել է Գեզիջին։
Սակայն հիմնական ընտրազանգվածը, որի ձայնը որոշիչ է լինելու ընտրություններում, Y սերունդն է՝ ծնված 1980-1999 թվականներին։ Այն կազմում է ընտրողների 32,6 տոկոսը և չկողմնորոշված ընտրողների ավելի բարձր հատվածը:
«Նրանք, որոնք հիշում են հին Թուրքիան, որոնք սերտ կենտրոնամետ են, բայց մնում են չկողմնորոշված, որոշելու են այս ընտրությունների ճակատագիրը»,- ասել է Գեզիջին։
Նա նշել է, որ չկողմնորոշված ընտրողների 70 տոկոսն այդ սերնդից է, և նրանց մեծ մասը կանայք են։
Ընդհանուր առմամբ, ընտրությունների մոտենալուն զուգահեռ՝ ավելի քիչ են չկողմնորոշված ընտրողները։ Գեզիջին նշել է, որ ներկայիս ցուցանիշը կազմում է 16 տոկոս, որոնց 92,7 տոկոսը 40 տարեկանից ցածր ընտրողներ են:
«Այս խմբից 68 տոկոսն ապրում է ամսական 5500 լիրայից (318 դոլար) պակաս գումարով: Տնտեսական ճգնաժամը ստիպում է որոշում կայացնել չկողմնորոշվածներին և հաճախ նրանց մոտեցնում է ընդդիմադիր կուսակցությանը»,- ասել է նա։
Ե՛վ Y, և՛ Z սերնդի ներկայացուցիչների 72 տոկոսն ասել է, որ դժվարությամբ է ծայրը ծայրին հասցնում, իսկ 76 տոկոսը կարծում է, որ մեկ տարի հետո տնտեսությունը չի կարգավորվի: Ընդհանուր առմամբ, 56․8 տոկոսն ասել է, որ ընդդիմադիր թեկնածուն ավելի լավ նախագահ կլինի, մինչդեռ 43․2 տոկոսը չի հավատում նաև ընդդիմությանը:
Էմմա Չոբանյան
