Դասարանների բեռնաթափում՝ ուսուցիչների դեֆիցիտի ֆոնին․ ինչպե՞ս է իրագործվելու ռեֆորմը․ ՏԵՍԱՆՅՈՒԹ

Հանրակրթական դպրոցներում տարրական և միջին մակարդակում դասարաններում նախատեսվում է ունենալ առավելագույնը 25 աշակերտ, իսկ ավագ մակարդակում` 20 աշակերտ:

ԿԳՄՍ նախարարությունը հանրային քննարկման է ներկայացրել նախագիծ, որով սահմանվում է դասարանների կազմավորման նոր կարգը: Գործող կարգով դասարաններում աշակերտների առավելագույն քանակն ավագ դպրոցում 30 է, հիմնական դպրոցում` 35։ Նախարարության հիմնավորմամբ` ներկայացվող կարգավորումները պայմանավորված են դասարանների կոմպլեկտավորման սկզբունքները Հայաստանի առողջապահության և քաղաքաշինության նորմերին համապատասխանեցնելու, ինչպես նաև փոքրաթիվ համակազմ ունեցող դպրոցներում արդյունավետ և որակյալ կրթություն կազմակերպելու անհրաժեշտությամբ: Նախագիծը, հանրության շրջանում ի հայտ բերած ոգևորությանը զուգահեռ, նաև մի շարք հարցեր է առաջացրել:

Կրթության փորձագետ Ատոմ Մխիթարյանը նկատում է՝ առանց այդ էլ հանրապետությունում ուսուցիչների լուրջ դեֆիցիտ կա, և հարցադրում անում՝ դասարանների ավելացման պարագայում նախարարությունն ինչպե՞ս է լրացնելու ուսուցիչների պակասը:

Կրթության զարգացման և նորարարության ազգային կենտրոնի (ԿԶՆԱԿ) տնօրեն Արտաշես Թորոսյանը շեշտում է՝ հանրապետությունում ուսուցիչների դեֆիցիտի խնդիրը լուծվում է, օրինակ, կամավոր ատեստավորման միջոցով, որի շնորհիվ բարձրանում է ուսուցչի աշխատավարձը, այդ աշխատանքն ավելի գրավիչ է դառնում: Արտաշես Թորոսյանի խոսքով՝ այնպես չէ, որ դասարանների թվի ավելացմանը զուգահեռ ուսուցիչների թվի պակաս է զգացվելու:

Նախագիծը ոգևորությամբ է ընդունվել հատկապես ուսուցիչների և ծնողների շրջանում: Թիվ 114 ավագ դպրոցի ուսուցչուհի Նարինե Մալախյանը վստահ է՝ դասարանների բեռնաթափումը կնպաստի դասապրոցեսի առավել արդյունավետ անցկացմանը: Արմինե Մուրադյանն էլ, ում որդին դպրոցական է, համոզված է՝ փոփոխությունը դրական կանդրադառնա կրթության որակի վրա։

Կրթության փորձագետը, սակայն, դասարանների ավելացման դեպքում ևս մեկ խնդիր է մատնանշում․ արդյո՞ք մեր դպրոցների շենքային պայմանները թույլ են տալիս նման կտրուկ փոփոխություններ իրականացնել:

Մանրամասները՝ տեսանյութում։

Աննա Բաբաջանյան