26.08.2026 | 11:16
Ջերմաստիճանը կնվազի 7-9 աստիճանով․ սպասվում են անձրև, կարկուտ և ուժեղ քամի
Պատերազմի օրերի ապատեղեկատվությունը մեծ դեր ունի ԶԼՄ-ների նկատմամբ ցածր վստահության հարցում․ Արևիկ Սահակյան․ ՏԵՍԱՆՅՈՒԹ
Հասարակություն
17.06.2022 | 14:28
«ԶԼՄ-ների նկատմամբ վստահության տխուր ցուցանիշի մեջ մեծ դեր ունի 44-օրյա պատերազմի օրերին լրատվամիջոցներից հորդած տեղեկատվությունը»,- «Մեդիան` թիրախում. ինչպես վերականգնել ԶԼՄ-ների նկատմամբ վստահությունը» թեմայով ասուլիսում այս տեսակետը հայտնեց Factor TV-ի գործադիր ղեկավար Արևիկ Սահակյանը՝ հավելելով, որ ռազմական դրություն էր, հաճախ տրվում էր պաշտոնական տեղեկատվություն, որը լրատվամիջոցներն իրավունք չունեին կասկածի տակ դնելու, սակայն, միևնույն է, քաղաքացին ապատեղեկատվության մեղավորը դիտում է լրատվամիջոցին:
Արևիկ Սահակյանը մտահոգություն հայտնեց լրատվամիջոցների բևեռվածության առնչությամբ՝ նշելով. «Չափազանց բևեռացված իրավիճակում ենք, քաղաքական բևեռվածությունն, անշուշտ, չէր կարող չպրոյեկցվել մեդիադաշտի վրա և չունենալ բացասական հետևանքներ, ըստ էության, անկախ լրատվական դաշտ ձևավորված չէ, տարբեր լրատվամիջոցներ տարբեր ազդեցությունների ներքո են, տարբեր օրակարգեր ունեն»:
Factor TV-ի գործադիր ղեկավարն անդրադարձավ նաև մեդիագրագիտության խնդրին՝ կարևորելով աշխատանքը հանրության մեդիագրագիտության աստիճանը բարձրացնելու ուղղությամբ : «Սա տեղեկատվական անվտանգության հարց է»,- ընդգծեց Սահակյանը:
Մանրամասները՝ տեսանյութում։
