18.08.2026 | 10:44
Էրդողանը Դոնալդ Թրամփի հետ ԱՄՆ-Իրան հակամարտությունն է քննարկել
2021-ին ռազմական ծախսերի կատարողականը 99,9% է․ շեղում չպետք է ունենանք․ Անդրանիկ Քոչարյան․ ՏԵՍԱՆՅՈՒԹ
Քաղաքականություն
15.06.2022 | 14:11
«Այնպես ստացվեց, որ «Լաո»-ի արթուն մասը մենք ենք, քնած մասը աջ կողմում է: Ուստի շարունակենք այդ տրամաբանությամբ, որովհետև բյուջեի կատարողականը իրականում այն հարթակը պետք է ապահովեր, որտեղ մենք պետք է նայեինք հեռանկարը մեր երկրի շարունակական՝ Կառավարության ծրագրի կատարման տեսանկյունից»,- Այս մասին ԱԺ նիստում նշեց Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը:
Անդրադառնալով Հայաստանի Հանրապետության 2021 թվականի պետական բյուջեի կատարման տարեկան հաշվետվությանը՝ Քոչարյանը նշեց. «Հայաստանում ռազմական պաշտպանությանն ուղղված ծախսերի կատարողականը հաստատված մակարդակի համեմատ կազմել է 108.9 տոկոս, ճշտված ծրագրի համեմատ 99.9 տոկոս: «2021 թվականի պետական բյուջեի փաստացի ծախսերի 16.8 տոկոսը կամ 336 մլրդ դրամը տրամադրվել է պաշտպանությանը, այն 2021-ի հաստատվածից ավել է 7.6 տոկոսով: Ճշտված ծրագրերից պակաս է 0.2 տոկոսով: 2020 թվականի փաստացի մակարդակից ցածր է 13.3 տոկոսով՝ հասկանալի պատճառներով, քանի որ 2020-ին այն իրողությունը, որում մեր երկիրը հայտնվեց, բնականաբար ծախսային մասը պետք է կտրուկ ավելանար»:
Պատգամավորը հավելեց, որ պաշտպանության և անվտանգության հարցերի համատեքստում 44-օրյա պատերազմից հետո կա ծախսերի և բովանդակության փոփոխություն, որն անհրաժեշտ է երկրի անվտանգության կայուն ընթացքն ապահովելու համար:
2021-ին պաշտպանության բնագավառի ծախսերը կազմել են ՀՆԱ-ի 4.8 տոկոսը, որը 0.1 տոկոսով պակաս է 2021-ի ծրագրված մակարդակից, համապատասխանում է 2019-ի փաստացի մակարդակին և շուրջ 0.8 տոկոսային կետով ավել է 2018 թվականի փաստացի մակարդակից:
«Հատկանշական է, որ ռազմական պաշտպանությանն ուղղված ծախսերը, որոնք կազմել են 333.6 մլրդ դրամ ՝ 2019 և 2018-ին գերազանցում են համապատասխանաբար 9.8 տոկոսով և 45.7 տոկոսով: Իսկ կատարողականը հաստատված մակարդակի համեմատ կազմել է 108.9 տոկոս՝ ճշտված ծրագրի համեմատ 99.9 տոկոս»,-ասաց պատգամավորը:
Ռազմարդյունաբերության համալիրի զարգացման ծրագրի ծախսերը կազմել են շուրջ 2 մլրդ դրամ՝ ապահովելով 100 տոկոս կատարողական:
«Այս թվերի տրամաբանությունը, կատարված աշխատանքները հիմք են տալիս ենթադրելու, որ 2021-2026 ծրագրով սահմանված այնպիսի նպատակների իրագործման, ինչպիսիք են ԶՈՒ մարտունակության վերականգնումն ու տեխնոլոգիական արդիականացումը, կլինեն շարունակական: Եվ մենք, հետևողականորեն ծրագրերի ծավալը մեծացնելով, կհասնենք այն նպատակին, որը նախանշված է պաշտպանության ոլորտում կառավարության ծրագրի այդ մասում»,-ասաց Քոչարյանը:
Նա նաև հայտնեց, որ Ազգային անվտանգության ծառայության գծով ծախսերի ավելացում կա, 2018 և 2019 թթ համեմատ մոտ 22 տոկոս աճ կա:
Մանրամասները՝ տեսանյութում:
