Քաղաքականություն
10.06.2022 | 18:24
ԱՄՆ Կոնգրեսի Ներկայացուցիչների պալատի հանձնաժողովը, որը հետաքննում է 2021 թվականի հունվարի 6-ին Կապիտոլիումի վրա հարձակումը, ներկայացրել է առաջին ապացույցն այն մասին, որ նախկին նախագահ Դոնալդ Թրամփը ներգրավված է եղել դրա կազմակերպման գործում։ Այս մասն հայտնում է The Washington Post-ը, որին վկայակոչում է Lenta-ն:
Ինը հոգանոց հանձնաժողովը միջադեպի մեջ ուղղակիորեն մեղադրել է Թրամփին։
«Բռնությունը պատահական չի եղել։ Դա Թրամփի վերջին ամենահուսահատ շանսն էր՝ կանգնեցնելու իշխանության փոխանցումը։ Եվ, ի վերջո, Դոնալդ Թրամփը՝ Միացյալ Նահանգների նախագահը, դրդեց Սահմանադրության ներքին թշնամիներին երթով շարժվել դեպի Կապիտոլիում և խարխլել ամերիկյան ժողովրդավարությունը»,- ասել է հանձնաժողովի նախագահ Բենի Ջ. Թոմսոնը:
Հանձնաժողովի անդամ Լիզ Չեյնին նշել է, որ Թրամփը փորձել է օգտագործել իր վարչակազմի ռեսուրսները, ներառյալ՝ Արդարադատության նախարարությունը, քվեարկությունը չեղարկելու համար, այնուհետև ճնշում է գործադրել փոխնախագահ Մայք Փենսի վրա՝ չեղյալ համարելու ընտրիչների քվեարկությունը:
Հիշեցնենք, որ Կապիտոլիումի գրոհը տեղի է ունեցել 2021 թվականի հունվարի 6-ին Թրամփի կողմնակիցների հանրահավաքի ժամանակ, որոնք չէին ճանաչել քվեարկության արդյունքները։ Բողոքի ցույցերը հանգեցրել էին ոստիկանության հետ լայնամասշտաբ բախումների։ Հարձակման էր ենթարկվել 140 ոստիկան, 5 մարդ մահացել էր։
Էմմա Չոբանյան
