Քաղաքականություն
10.06.2022 | 15:36
Amnesty International միջազգային իրավապաշտպան կազմակերպությունն անդրադարձել է ինքնահռչակ Դոնեցկի հանրապետության դատարանի կողմից Մեծ Բրիտանիայի և Մարոկկոյի քաղաքացիներին մահապատժի դատապարտելու վճռին։ Մասնավորապես, կազմակերպության Արևելյան Եվրոպայի և Կենտրոնական Ասիայի փոխտնօրեն Դենիս Կրիվոշեևն ասել է, որ դա միջազգային մարդասիրական իրավունքի կոպտագույն խախտում է՝ բազմաթիվ կետերով:
Ըստ նրա՝ երեքն էլ Ուկրաինայի կանոնավոր զորքերի զինծառայողներ են, հետևաբար, Ժնևի կոնվենցիաների համաձայն, որպես ռազմագերիներ՝ պաշտպանված են ռազմական գործողություններին մասնակցելու համար հետապնդումից։
«Ռազմագերիներին կամ այլ պաշտպանված անձին արդար և պատշաճ դատաքննության իրավունքից դիտավորյալ զրկելը ռազմական հանցագործություն է: Ռուսաստանը, որպես օկուպացիոն տերություն, պատասխանատու է բոլոր ռազմագերիների և ազատությունից զրկված այլ անձանց նկատմամբ պատշաճ վերաբերմունքի համար։ Նա պետք է ապահովի, որ այս, այսպես կոչված, դատավճիռը անհապաղ չեղարկվի, և այդ մարդկանց հետ վերաբերվեն միջազգային մարդասիրական իրավունքին լիովին համապատասխան»,- ասել է Կրիվոշեևը։
Հիշեցնենք, որ ինքնահռչակ Դոնեցկի ժողովրդական հանրապետության, այսպես կոչված, «Գերագույն դատարանը» նախօրեին Ուկրաինայի կողմից ռազմական գործողություններին մասնակցելու գործով մահապատժի էր դատապարտել երեք օտարերկրացու։ Դատավճիռը կայացվել է Մեծ Բրիտանիայի երկու քաղաքացիներ Շոն Փինների և Էյդեն Ասլինի, ինչպես նաև Մարոկկոյի քաղաքացի Սաադուն Բրահիմի նկատմամբ։
Էմմա Չոբանյան
