ԱԱԾ-ն փնտրում է Փաշինյանի կեցավայրի մոտ բռնություն կիրառողներին. ընդդիմությունը հակադարձում է` իշխանական սադրանք է. ՏԵՍԱՆՅՈւԹ

Պռոշյան փողոցում՝ Նիկոլ Փաշինյանի կեցավայրի դիմաց հունիսի 3-ին ոստիկանների և ակցիայի մասնակիցների միջև տեղի ունեցած բախումներից հետո Արգիշտի Քյարամյանի ղեկավարած Քննչական կոմիտեն 15 անձի մեղադրանք է առաջադրել: Նրանցից 10-ը կալանավորվել է, 4-ը ստորագրությամբ ազատ է արձակվել, ևս 1-ին կալանավորելու միջնորդություն է ներկայացվել դատարան:

Նրանք մեղադրվում են Փաշինյանի հրաժարականի պահանջով իրականացված բողոքի ակցիայի ժամանակ բռնություններ կիրառելու համար: Ըստ իրավապահ կառույցի՝ ակցիայի մասնակիցները մետաղյա ձողերով, մուրճերով, շշերով, ինչպես նաև այլ առարկաներով հարվածներ են հասցրել ոստիկաններին: Մարմնական վնասվածք է ստացել չորս տասնյակից ավելի ծառայող։

Այդ օրը Առողջապահության նախարարությունը հայտնել էր, ընդհանուր առմամբ, 60 քաղաքացու տարբեր ԲԿ-ներ դիմելու մասին, որից 20-ը քաղաքացիական անձինք էին: Ուշագրավ է, որ երեկ երեկոյան ՔԿ-ի տարածած հաղորդագրության մեջ որևէ խոսք չկար ո՛չ մարմնական վնասվածքներ ստացած քաղաքացիների, ո՛չ էլ պատճառների մասին:

Ոստիկանությունն այդ օրը լուսաձայնային նռնակներ էր կիրառել: Իրավապաշտպան Նինա Կարապետյանցն առանց զգուշացման լուսաձայնային նռնակներ կիրառելու որոշումն անթույլատրելի է համարում: Իսկ ահա ՄԻՊ Քրիստիննե Գրիգորյանի խոսքով՝ կան իրավիճակներ, երբ հատուկ միջոցները կիրառվում են առանց զգուշացման: ՄԻՊ-ը, այդուհանդերձ, դիմել է ոստիկանություն և պահանջել ներկայացնել այն հիմնավորումները, որոնք եղել են լուսաձայնային նռնակներ կիրառելու որոշման հիմքում:

Դեպքից արդեն հինգ օր է անցել, սակայն իրավապահ կառույցները դեռ լռում են ոստիկանների գործողություններին քրեաիրավական գնահատական տալու առնչությամբ: Մեղադրյալներն առայժմ միայն ցուցարարներ են: Գլխավոր դատախազությունից Factor TV-ին հայտնեցին, որ Հակակոռուպցիոն կոմիտեում նյութեր են նախապատրաստվում, ոստիկանության ծառայողների գործողությունների ուսումնասիրությունը շարունակվում է:

Այսօր համատեղ հայտարարությամբ ոստիկանության գործողությունները դատապարտել են խորհրդարանական «Հայաստան» և «Պատիվ ունեմ» խմբակցությունները: Նրանք իրավիճակի լարման համար մեղադրում են քաղաքական իշխանությանն ու անձամբ վարչապետին: Ուշագրավ է, որ ընդդիմությունը տարածած հայտարարության մեջ որևէ կերպ չի դատապարտել ցուցարարների շարքերից ոստիկանների ուղղությամբ տարբեր առարկաներ նետելը կամ մուրճով հարվածելը:

Պռոշյան փողոցում տեղի ունեցած միջադեպի գործով մեղադրյալների թիվն առաջիկայում, հնարավոր է, աճի: ՔԿ-ից փոխանցում են, որ Ազգային անվտանգության ծառայության և ոստիկանության համապատասխան ստորաբաժանումներն իրականացնում են անհրաժեշտ միջոցառումներ՝ զանգվածային անկարգությունների կազմակերպիչների և դրանց մասնակցած այլ անձանց ինքնությունը պարզելու, վարույթն իրականացնող մարմին ներկայացնելու ուղղությամբ։

Մանրամասները՝ տեսանյութում։

Նարեկ Կիրակոսյան