Վտանգներով լի «ճամփորդություն». պատկերասրահը պատրա՞ստ է հայտնի նկարներն անվնաս հասցնել դպրոցներ․ ՏԵՍԱՆՅՈՒԹ

ԿԳՄՍ նախարարության նախաձեռնությամբ Շահինի, Ժանսեմի, Այվազյանի, Կոջոյանի, Սարյանի և այլ հայտնի նկարիչների գործեր արդեն հասցրել են ճամփորդել Լոռու և Տավուշի մարզերում։

«Դասարվեստ» ծրագիրն իրականացվում է Հայաստանի ազգային պատկերասրահի հետ համագործակցությամբ: Մտահղացման մասին դեռևս 2019 թվականին հայտարարել էր վարչապետ Նիկոլ Փաշինյանը։ Թե՛ այն ժամանակ, թե՛ հիմա ոլորտի գործիչներից շատերը քննադատությամբ են մոտենում հարցին։ Ահազանգում են` արվեստի գործերը թանգարանից մարզեր տեղափոխելու համար նախ պետք է ապահովագրել կտավները, տեղափոխման անվտանգ պայմաններ ապահովել, հոգալ ջերմաստիճանի, լուսավորության, օդափոխության հետ կապված հարցերը:

Նկարիչ, քանդակագործ Սահակ Պողոսյանն օրինակ է բերում արտերկրի փորձը․ «Դրա համար գոյություն ունի օրենք, բոլոր ստեղծագործություններն ունեն ապահովագրման իրենց գինը, ստեղծագործություններն ունեն տեղափոխման հատուկ ռեժիմ և պայմաններ, գոյություն ունեն հատուկ արկղեր, մեքենաներ, ոստիկանության սպասարկող անձնակազմ․ այդ դեպքում է միայն կատարվում տեղափոխությունը»։

Հայաստանի ազգային պատկերասրահի տնօրեն Մարինա Հակոբյանն էլ հավաստիացնում է՝ նկարների՝ թանգարանից դպրոցներ անվտանգ տեղափոխության համար բոլոր պայմանները ստեղծված են։ Ինչ վերաբերում է ապահովագրությանը, այն ևս բոլոր նկարների դեպքում իրականացվել է: Պատկերասրահի տնօրենի խոսքով՝ ամեն կրթական ծրագրի շրջանակում ներկայացված է մեկ բնօրինակ աշխատանք և օժանդակ նյութեր՝ աշխատանքների տպագրված տարբերակների տեսքով:

Սահակ Պողոսյանը խոսում է նաև ֆորսմաժորային իրավիճակների, չնախատեսված պատահարների մասին, որոնք կարող են պատահել նկարների տեղափոխության ժամանակ:

Մինչ մասնագետներից ոմանք ահազանգում են կտավների տեղափոխության, ցուցադրման ընթացքում առկա վտանգների մասին, «Դասարվեստ» ծրագիրը շարունակվում է. առաջիկայում հանրահայտ նկարիչների գործերը կճամփորդեն Հայաստանի մյուս ութ մարզերում:

Մանրամասները՝ տեսանյութում։

Աննա Բաբաջանյան