12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
2020 թ․ համեմատ՝ պետական պարտքն աճել է 6.4 տոկոսով. ֆինանսների նախարար․ ՏԵՍԱՆՅՈՒԹ
Տնտեսություն
31.05.2022 | 13:53
2021-ին արձանագրվել է ՀՆԱ-ի 5.7 տոկոս աճ: Այս մասին ԱԺ մշտական հանձնաժողովների համատեղ նիստում հայտնեց ՀՀ ֆինանսների նախարար Տիգրան Խաչատրյանը:
Նրա խոսքով` տնտեսության տարբեր ոլորտներից ծառայություններն են համեմատաբար ավելի մեծ ազդեցություն ունեցել:
«Եթե հետևենք աճի ցուցանիշներին, ապա կնկատենք, որ արդյունաբերության աճը նույնպես եղել է նկատելի, 4.2 տոկոս աճ ենք արձանագրել: Ծառայությունները` 7.8, շինարարությունն է նկատելի աճել` 2.6 տոկոս»,- ասաց Խաչատրյանը:
Միակ ոլորտը, որտեղ եղել է նվազում, գյուղատնտեսությունն էր: Նվազումը կազմել է 1.4 տոկոս: Խաչատրյանը նշեց նաև, որ ամբողջ 2021 թվականի ընթացքում գնաճի բարձր ֆոն է դիտվել:
«Միջին գնաճը կազմել է 7.2 տոկոս: Գնաճն ամբողջ աշխարհում նկատված երևույթ է, որը նկատվել է ինչպես նախորդ, այնպես էլ այս տարվա ընթացքում: Առավելապես պայմանավորված էր այն գործոններով, որ կորոնավիրուսի համավարակը բազմաթիվ արժեշղթաներ դուրս էր բերել իրենց բնականոն ընթացքից, մատակարարումները չեն կատարվել ժամանակին, ռեսուրսները եղել են սահմանափակ, և այդ պայմաններում առաջին հերթին ազդեցություն են կրել հատկապես պարենի գները»,- ասաց Խաչատրյանը:
Նրա խոսքով՝ արձանագրվել է ՀՆԱ-ի նկատմամբ 4,6 տոկոս դեֆիցիտ, ինչը թույլ է տվել, որ կառավարության պարտքը ՀՆԱ-ի նկատմամբ 2020-ին արձանագրված 63,5 տոկոսից նվազի և 2021-ին կազմի 60,3 տոկոս:
«Մենք 2020-ին և 2021-ին ունեցել ենք միջին պատմական դեֆիցիտից մի քիչ ավելի բարձր ցուցանիշ: Եվ մեր նպատակն է երկարաժամկետում վերադառնալ դեպի ներքև: Դա նաև մեր պարտքի քաղաքականության հիմքում է ընկած: Մակրոտնտեսական կայունություն երաշխավորելու համար պետք է միջնաժամկետում ունենանք պարտքի նվազող ցուցանիշներ՝ ՀՆԱ-ի նկատմամբ»,- ասաց Խաչատրյանը:
Ֆինանսների նախարարը նաև ընդգծեց, որ 2020 թ․ համեմատ՝ պետական պարտքն աճել է 6.4 տոկոսով:
Մանրամասները՝ տեսանյութում:
