Ռուսաստանը Սիրիայում ուժեղացնում է իր զորքերը՝ Թուրքիայի հնարավոր հարձակման լուրերի ֆոնին

Ռուսաստանը Սիրիայում ուժեղացնում է ռազմական ներկայությունը թուրքական հնարավոր հարձակման ֆոնին։ Մասնավորապես, ռուսական կողմը կործանիչներ և ուղղաթիռներ էուղարկել Սիրիայի հյուսիսարևելյան Ղամիշլիի օդանավակայան։ Այս մասին գրում է «Ահվալ» գործակալությունը՝ վկայակոչելով Asharq al-Awsat-ին։

Օդանավակայանը գտնվում է այն շրջանում, որը վերահսկվում է ԱՄՆ-ի կողմից աջակցվող քրդական Սիրիայի դեմոկրատական ուժեր (SDF) խմբավորման կողմից:

Տեղակայումը տեղի է ունենում այն ժամանակ, երբ տեղեկություններ են ստացվում, որ Թուրքիան պատրաստվում է հերթական ներխուժմանը այդ տարածք։ Լրատվամիջոցը նշում է, որ շաբաթ ռուսական 6 ուղղաթիռ դիտարկում է իրականացրել թուրք-սիրիական սահմանին։ Սիրիական վարչակազմն ու Ռուսաստանը ամրապնդել են իրենց դիրքերը Հասաքեում և Ղամիշլիում։

ԱՄՆ զորքերն էլ տարածքում հսկողություն են իրականացնում։ Նշվում է, որ տեղացիներն անհանգստացած են թուրքական հնարավոր գործողությունից։

Հավելենք, որ Սիրիայի հյուսիսում նախորդ ներխուժումների միջոցով Թուրքիան ոչ լիարժեք անվտանգության գոտի է ստեղծել իր սահմանի երկայնքով, որտեղ Ռուսաստանը համոզել է քրդական ուժերին՝ հեռանալ իրենց վերահսկողության տակ գտնվող տարածքի զգալի հատվածից:

«Մենք հետ ենք քաշել մեր ուժերը՝ պատերազմից խուսափելու համար։ Սակայն մենք զգոն ենք ցանկացած հարձակման համար»,- Asharq al-Awsat-ին ասել է քուրդ-սիրիական Ժողովրդական պաշտպանության ջոկատների (YPG) խոսնակը։

Նա նշել է, որ YPG-ն հենվում է սեփական ուժերի, այլ ոչ թե Մոսկվայի կամ Վաշինգտոնի վրա։ Մոսկվան և Վաշինգտոնը Թուրքիայի հետ ապաէսկալացիայի համաձայնագրերի երաշխավորներ են։

Հիշեցնենք, որ օրերս Թուրքիայի Ազգային անվտանգության խորհուրդը հայտարարություն էր տարածել, ըստ որի՝ Անկարայի ներկա և ապագա ռազմական գործողությունները նրա հարավային սահմաններում, իբր, չեն թիրախավորում իր հարևանների ինքնիշխանությունը, այլ անհրաժեշտ են  անվտանգության համար։

Էմմա Չոբանյան