07.05.2024 | 23:30
ԵԽ-ն Թուրքիային կոչ է անում ազատ արձակել կալանավորված լրագրողներին
Ադրբեջանի ԱԳՆ-ն արձագանքել է ՀՀ ԱԳՆ-ի հայտարարությանը
Քաղաքականություն
28.05.2022 | 19:30
Ադրբեջանի արտաքին գործերի նախարարությունն արձագանքել է Հայաստանի ԱԳՆ հայտարարությանը, գրում է Ինտերֆաքսը: Ադրբեջանի արտաքին գերատեսչությունն ափսոսանք է հայտնել այդ առիթով՝ Ալիևի խոսքերին ի պատասխան հրապարակված հաղորդագրությունը գնահատելով որպես «հերթական անհիմն հայտարարություն»։
Բաքուն պնդում է, թե իրենք հետևողականորեն հարգել են միջազգային իրավունքի սկզբունքները, իսկ «Հայաստանը, որը շուրջ 30 տարի խախտում է դրանք», վերջին ժամանակներս հաճախակի է սկսել վկայակոչել միջազգային իրավունքը:
«Ադրբեջանական պետության ղեկավարը կոչ է անում զերծ մնալ միջազգային իրավունքի սկզբունքներին չհամապատասխանող վարքագծից և նախազգուշացնում այն վտանգների մասին, որոնք կարող է ներկայացնել նման հակաիրավական վարքագիծը»,- մասնավորապես ասված է Ադրբեջանի ԱԳՆ-ի հայտարարության մեջ:
«Հայկական կողմը պետք է հասկանա, որ տասնամյա վաղեմության պահվածքն իրականացնելու փորձերը ոչ այլ ինչ են, քան երևակայություն։ Միայն տարածաշրջանում ստեղծված նոր իրողությունների և նոր հնարավորությունների ճիշտ գնահատականը կարող է հանգեցնել ճիշտ արդյունքների»,-հայտարարել են Ադրբեջանի ԱԳՆ-ում:
Հիշեցնենք՝ ավելի վաղ Հայաստանի արտաքին գործերի նախարար Արարատ Միրզոյանն անդրադարձել էր Ադրբեջանի նախագահ Իլհամ Ալիևի հայտարարությանը, թե «Լեռնային Ղարաբաղ չկա, ԼՂ հիմնախնդիրը լուծված է, ԵԱՀԿ Մինսկի խումբ չկա»: ՀՀ ԱԳ նախարարն ընդգծել էր, որ կարող են ի ցույց դնել Ադրբեջանի նախագահի կողմից ստորագրված և ուժի մեջ գտնվող փաստաթուղթ, որտեղ ասվում է, որ կա Լեռնային Ղարաբաղ, և դա 2020 թվականի նոյեմբերի 9-ի եռակողմ հայտարարությունն է: Արարատ Միրզոյանը շեշտել է, որ այդ փաստաթուղթը ստորագրելով՝ Ադրբեջանի նախագահն ընդունել է Լեռնային Ղարաբաղի գոյությունը, ու սա անշրջելի փաստ է:
