Քանդե՞լ ավտոտնակները, թե՞ համակերպվել գարշահոտության հետ․ բակ լցված կոյուղաջրերը՝ անլուծելի խնդիր․ ՏԵՍԱՆՅՈՒԹ

Նազարբեկյան 16 շենքի բնակիչներն ահազանգում են, որ արդեն 2 շաբաթ է՝ կոյուղաջրերը լցվել են բակ և որևէ լուծում չի տրվում։ Տարածքը սպասարկող «Վան» համատիրության ղեկավար Կարինե Գրիգորյանն ասում է՝ «Վեոլիա ջուր» ընկերությունից պարբերաբար գալիս են, աշխատանքներ կատարում, բայց խնդիրը մնում է չլուծված։

Պարզվում է՝ խնդիրը ոչ թե շաբաթների կամ ամիսների, այլ 4 տարվա վաղեմություն ունի։ «Վեոլիա ջուր» ընկերության հանրային կապերի բաժնի պետ Մուրադ Սարգսյանն ասում է՝ համատիրության ներկա ու նախկին ղեկավարները տեղեկացված են, որ խնդրի լուծումն անհնարին են դարձնում բակում կառուցված ավտոտնակները, որոնք կառուցվել են կոյուղագծերի վրա։

«Վեոլիա ջուր»-ն ավտոտնակները քանդել չի կարող, նոր կոյուղագիծ կառուցելն էլ իրենց գործառույթների մեջ չի մտնում։ Այս իրավիճակում խնդրի լուծման համար շատ տարբերակներ չկան՝ ասում է Մուրադ Սարգսյանը, պետք է կա՛մ քանդվեն ավտոտնակները, կա՛մ նոր կոյուղագիծ կառուցվի, որը ֆինանսական մեծ ներդրում կպահանջի։

Աջափնյակ վարչական շրջանի կոմունալ բաժնի պետ Ռոման Ալոյանը Factor TV-ի հետ զրույցում ասաց, որ խնդրին ծանոթ է, փորձում են համատեղ լուծում գտնել։

Երևանում 600․000-ից ավելի ապօրինի կառուցված շինություններ կան, այդ թվում՝ ավտոտնակներ։ Արդյո՞ք Նազարբեկյան 16 շենքի բակում կառուցված ավտոտնակները դրանց թվում չեն, այս հարցի պատասխանը մեզ ստանալ չհաջողվեց։ Մինչ «Վեոլիա ջուր» ընկերությունից մատնանշում են դրանց կառուցման ընթացքում քաղաքաշինական նորմերի խախտումները, հարակից շենքերի բնակիչները, որոնցից շատերն այստեղ ավտոտնակներ ունեն, շարունակում են բողոքել կոյուղու՝ այդպես էլ լուծում չստացող խնդրից։

Մանրամասները՝ տեսանյութում։

Սաթենիկ Հայրապետյան