Գերմանիայի կանցլերը կոչ է արել թույլ չտալ ՌԴ-ին՝ հաղթել Ուկրաինայի դեմ պատերազմում

Գերմանիայի դաշնային կանցլեր Օլաֆ Շոլցը հանդես է եկել ՌԴ ռազմական ագրեսիայից պաշտպանվող Ուկրաինային ծանր սպառազինություն մատակարարելու օգտին, գրում է DW-ի ռուսական ծառայությունը։

«Կոշտ հարձակման ենթարկված երկրին պաշտպանության հարցում օգնելը էսկալացիա չէ։ Դա հարձակումն անդրադարձնելու հարցում ներդրում է, դրանով իսկ բռնությանը շուտափույթ վերջ դնելուն»,- հայտարարել է նա Բունդեսթահում՝ ԵՄ առաջիկա արտահերթ գագաթնաժողովին նվիրված իր ելույթում։

Գերմանիայի կառավարության ղեկավարի խոսքով՝ ինքը, ինչպես մնացածը, մտահոգված է Ուկրաինայում շարունակվող պատերազմով․ «Մեզ բոլորիս միավորում է ընդհանուր նպատակը՝ թույլ չտալ, որ Ռուսաստանը հաղթի այս պատերազմում: Ուկրաինան պետք է դիմակայի»։

Միևնույն ժամանակ, Շոլցը մերժել է Ուկրաինային սեփական պայմաններով խաղաղություն պարտադրելու՝ Ռուսաստանի փորձերը։

«Թելադրված խաղաղություն չի լինելու, քանի որ ուկրաինացիները չեն ընդունի դա, մենք նույնպես»,- ասել է նա։

Միայն այն ժամանակ, երբ ՌԴ նախագահ Վլադիմիր Պուտինը հասկանա, որ չի կարող կոտրել Ուկրաինան, «կպատրաստվի լրջորեն բանակցել խաղաղության համար», իսկ դրա համար կարևոր է ուժեղացնել Կիևի պաշտպանունակությունը, հավելել է գերմանացի պաշտոնյան։

Շոլցը նաև նշել է, որ իր կառավարությունն աջակցում է Ուկրաինային, այդ թվում՝ պաշտպանության ոլորտում՝ «մտածված, հավասարակշռված և միջազգային մակարդակով սերտ համակարգմամբ»։

Գերմանիան այս հարցում միայնակ չի գործի և չի անի որևէ բան, որը կհանգեցնի նրան, որ ՆԱՏՕ-ն դառնա այս հակամարտության կողմերից մեկը, ասել է Գերմանիայի կանցլերը։ Նա նաև հավաստիացրել է Ուկրաինային շարունակական աջակցությունը, այդ թվում՝ Ռուսաստանի Դաշնության դեմ պատժամիջոցների, ուկրաինացի փախստականների ընդունման և տնտեսական օգնության տեսքով։

Տաթև Ֆռանգյան