Սոված-ծարավ մնացել են, վառելանյութը վերջանում է․ Լարսում հարյուրավոր բեռնատարներ արգելափակված են․ ՏԵՍԱՆՅՈՒԹ

Վերին Լարսի՝ այդպես էլ չլուծվող խնդիրը պարբերաբար գլխացավանք է դառնում բեռնափոխադրողների համար։ Արդեն 2 շաբաթից ավելի է՝ հայկական բեռնատարները չեն կարողանում հատել վրաց-ռուսական սահմանը՝ ահազանգում է այդ հերթերում մայիսի 4-ից սպասող Երվանդ Թարվերդյանը։

Որքան կամ ինչին սպասեն՝ չգիտեն։ Կիլոմետրերով շարված մեքենաների թիվն ավելանում է ամեն րոպե։ Վրաստանի սահմանապահները որևէ բացատրություն չեն տալիս։ Քաղաքացիները դիմել են Վրաստանում Հայաստանի դեսպանատուն, ասում են՝ այնտեղից էլ որևէ հուսադրող պատասխան չեն ստացել։ Factor TV-ն ևս կապ հաստատեց դեսպանատան հետ՝ հասկանալու համար, թե որն է նման կուտակումների պատճառը։

Խնդիրն արդեն 2-3 ամիս է՝ կա, ասում է Վրաստանում Հայաստանի հյուպատոսը։ Անցակետի թողունակությունն օրական 300-400 մեքենա է, դրանից ավելի ո՛չ ռուսական, ո՛չ վրացական կողմը չեն կարողանում սպասարկել, մեքենաների հոսքն էլ մեծ է, հետևաբար սահմանն անցնելու համար երբեմն 2 շաբաթ է պահանջվում։ Հայկական մեքենաներից շատերը հերթին սպասում են Բագրատաշեն-Սադախլո անցակետում ու Թբիլիսիի շրջանցիկ ճանապարհներին։

Միայն հայկական մեքենաները չեն, որ հերթի մեջ սպասում են՝ վստահեցնում է հյուպատոսը։ Ինչ վերաբերում է սահմանապահներին կաշառելու դիմաց սահմանն անցնելու մասին լուրերին, հյուպատոսը նշում է, որ վրացական կողմում դա բացառվում է, իսկ խնդիրը 1-2 օրում լուծվող հարց չէ։

Բեռնափոխադրող ընկերությունների պարագայում վարորդի սննդի և կեցության հարցն ընկերությունն է հոգում, ինչի պատճառով էլ փոխադրման գները գրեթե կրկնակի թանկացել են՝ ասում է արտահանում իրականացնող գործարար Երվանդ Թարվերդյանը, ում ապրանքը 15 օր մնալուց հետո է միայն հատել սահմանը։ Մինչ այդ էլ ստիպված է թարմ ձկնեղենով լցված 3 բեռնատար հետ վերադարձնել, վերամշակել ու սառեցված տարբերակով նորից արտահանել։

Եթե խոշոր գործարարներն իրենց խնդիրներն ինչ-որ կերպ կարողանում են լուծել,   ապա ֆերմերները կամ փոքր ընկերություններն ավելի խոցելի են։

Հարցի լուծման տարբերակներ Երվանդ Թարվերդյանն ինքն էլ է փորձել գտնել, անձնական կապերն օգտագործելով՝ թե՛ ռուսական, թե՛ վրացական կողմի հետ է բանակցել։ Հարցը նախարարի հետ այդպես էլ չի քննարկվել։ Էկոնոմիկայի նախարար Վահան Քերոբյանը ասում է՝ խնդիրը նոր չէ։

Ռուսաստանի վարչապետն էլ վերջերս հրամանագիր է ստորագրել, որով հանձնարարել են հարավային մաքսային կետերի թողունակությունն ավելացնել։ Նախարարը կարծում է՝ համատեղ աշխատանքն արդյունք կտա։ Թե ինչպիսի՞ն կլինի այդ արդյունքը արդեն 20 տարի լուծման սպասող խնդրի դեպքում, դժվար է ասել։  Առայժմ միայն կարելի է արձանագրել՝ շուտով ծիրանի արտահանման սեզոնն է մոտենում, և առաջիկա շաբաթներին խնդիրն ավելի կարող է սրվել։

Մանրամասները՝ տեսանյութում։

Սաթենիկ Հայրապետյան