26.06.2026 | 04:58
ԱԱ-2026. Նիդերլանդներն ու Ճապոնիան դուրս եկան փլեյ-օֆֆ. ՏԵՍԱՆՅՈՒԹ
ԵՄ-ն կարող է Հունգարիային գումար առաջարկել ռուսական նավթից հրաժարվելու համար․ Politico
Քաղաքականություն
11.05.2022 | 14:29
Եվրամիությունը կարող է Հունգարիային լրացուցիչ գումարներ խոստանալ էներգետիկ բարեփոխումների համար՝ Ռուսաստանի դեմ պատժամիջոցների 6-րդ փաթեթին համաձայնություն տալու դիմաց, որը ներառում է նաև ռուսական նավթից աստիճանական հրաժարում։ Այս մասին հայտնում է Politico-ն՝ վկայակոչելով ԵՄ անանուն բարձրաստիճան պաշտոնյաներին, փոխանցում է BBC-ի ռուսական ծառայությունը։
Ըստ լրատվամիջոցի աղբյուրների՝ Հունգարիային կարող են խոստանալ լրացուցիչ ֆինանսավորում ԵՄ նոր՝ REPowerEU ծրագրի շրջանակում, որով կհայտարարվի, որ ԵՄ-ն առաջիկա տարիներին ամբողջովին կազատվի ռուսական էներգակիրների կախվածությունից։
Մինչդեռ ԵՄ-ն Հունգարիայի դիրքորոշման պատճառով մի քանի օր է՝ չի կարողանում համաձայնեցնել պատժամիջոցների 6-րդ փաթեթը։ Դրանում, այլ սահմանափակումներից զատ, առաջարկվում է նաև հրաժարվել ռուսական նավթի գնումից արդեն իսկ այս տարվա վերջին, սակայն դրանից մեծ կախվածություն ունեցող երկրներին՝ Հունգարինային և Սլովակիային ժամանակ տալ մինչև 2024 թվականի վերջը, իսկ Չեխիային՝ 2024-ի կեսերը։
Հունգարիայի կառավարությունը Վիկտոր Օրբանի գլխավորությամբ դեռևս պնդում է, որ իր երկրի համար 2․5 տարին քիչ ժամանակ է, և որ ռուսական նավթից հրաժարումը լուրջ հարված կհասցնի հունգարական տնտեսությանը։
ԵՄ արտաքին քաղաքականության ղեկավար Ժոզեպ Բորելը նախօրեին հայտարարել էր, որ պատժամիջոցների 6-րդ փաթեթի քննարկումները շարունակվելու են մայիսի 16-ին։
Էմմա Չոբանյան
