Հայկական բեռնատարների կուտակումներ Լարսի ճանապարհին. ինչ է արվում իրավիճակը հարթելու համար

Արդեն 10 օրից ավել է հայկական բեռնատարները կանգնած են Թբիլիսիից դեպի Մցխեթա հատվածում՝ Զագեսիի մոտ, սպասում են Ռուսաստանի սահմանն անցնելու իրենց հերթին։ Տեղեկության համաձայն՝ տարածքում կուտակված է մոտ 300-400 բեռնատար, մեծ մասը հայկական, մի քանիսը բելառուսական համարանիշներով։ Այս մասին գրում է Aliq Media-ն։

Վարորդներից Ռաֆայել Օգանեսյանը «Ալիք մեդիայի» հետ զրույցում նշում է, որ արդեն 12 օր է, կանգնած են ճանապարհի եզրին, միայն երեկ է, որ 96 բեռնատար է բաց թողնվել դեպի Լարս.

«Արդեն 12 օր է կանգնած ենք, կան վարորդներ, որ 15-16 օր է ինչ կանգնած են։ 99 տոկոսը հայկական բեռնատարներն են, որոնք ցանկանում են հատել Ստեփանծմինդա-Լարսը, հասնել Ռուսաստան։ Պայմաններ էլ բավարար չկան, ջրի պակաս կա, պարենի, հացը անգամ կրկնակի թանկ են վաճառում։ Շատ դժվար է օրերով մի ձորակի մոտ կանգնած մնալ, որտեղ բեռնատարների ծայրն էլ չի երևում», — նշում է Օգանեսյանը։

Վարորդները դժգոհում են կանգնելու տեղից` նշելով, թե շատ անհարմար վայրում են կուտակվել բեռնատարները: Համաձայն տեղեկության՝ որոշ տեղերում կանգնելու համար էլ վարորդներից անգամ կանգնելավարձ են պահանջում, 1 օրվա համար 5 լարի։

«Ալիք մեդիան» կապ հաստատեց Վրաստանում Հայաստանի դեսպանության հետ, որտեղից պատասխանեցին, որ կուտակումների պատճառը եղանակային անբարենպաստ պայմաններն ու ռուսական կողմում իրականացվող շինարարական աշխատանքներն են։

«Վերջին օրերին եղանակային անբարենպաստ և վտանգավոր պայմանների պատճառով առկա են կուտակումներ, սակայն երեկվանից սկսվել է հերթական կարգով բեռնատարների սահմանն անցկացումը։ Այսօր արդեն նախատեսվում է թողնել 250 բեռնատար։ Եթե եղանակային չնախատեսված պայմաններ չնկատվեն, ապա մոտ 1 շաբաթում բեռնատարների հերթերն ու կուտակումները կվերանան, առավելագույնը 10 օրում», — նշում են դեսպանատնից։

Նրանց փոխանցմամբ՝ այժմ Ստեփանծմինդա-Լարս անցակետը օրական հատում է 300-400 բեռնատար։

Հիշեցնենք, որ մայիսի 7-ին Վրաստանի ավտոճանապարհների վարչությունը հայտնեց, որ միջազգային նշանակության Ստեփանծմինդա-Լարս ավտոճանապարհին արգելված է բոլոր տեսակի տրանսպորտային միջոցների տեղաշարժը։

Բեռնատարների երթևեկությունն անցակետում վերականգնվեց մայիսի 8-ի երեկոյան։ Երեկ արդեն վարչությունը հայտնեց, որ ավտոճանապարհին երթևեկությունն ընթանում է նորմալ ռեժիմով։