28.06.2026 | 18:42
Սաուդյան Արաբիայում ուղղաթիռի կործանման հետևանքով 14 մարդ է զոհվել
Օլեգ Տինկովն ուկրաինական պատերազմի պատճառով հրաժեշտ է տվել Ռուսաստանին և երկրից հանել է Tinkoff Bank-ն ու LA DATCHA բրենդը
Քաղաքականություն
03.05.2022 | 22:31
Լոնդոնաբնակ բանկիր Օլեգ Տինկովը ռուսական բիզնես էլիտայի այն քիչ անդամներից է, որը քննադատել է ՌԴ-ում ուկրաինական պատերազմը, գրում է BBC-ի ռուսական ծառայությունը:
Նա հայտարարել է, որ ուկրաինական պատերազմի պատճառով հրաժեշտ է տվել Ռուսաստանին և երկրից հանում է Tinkoff Bank ու LA DATCHA բրենդները։
«Ես չեմ կարող հանգիստ ապրել մի երկրում, որը պատերազմ է վարում հարևանի հետ՝ սպանելով խաղաղ բնակիչներին ու երեխաներին, ինձ ոչ մի հիմնավորում հարկավոր չէ։ Դա չարիք է, իսկ ես բարու կողմնակից եմ։ Ես չգիտեմ՝ ինչքան է ինձ մնացել ապրելու, սակայն ես հաստատ չեմ ուզում մահանալ այդ միլիարդներով, բայց որպես «սրիկա, վախկոտ ու աննշան մարդ», ինչպես ռուս օլիգարխների 90%-ը։ Վախկոտնե՛ր, մի կյանք ունեք, և այն պետք է ապրեք որպես մարդ։ Ես երկրից դուրս եմ հանում TINKOFF և LA DATCHA ապրանքանիշերը: Դրանք պատկանում են իմ ընտանիքին, ես չեմ ուզում դրանք «ապականել» ռուս զինվորների և Ուկրաինայի բնակիչների արյունով։ Ուկրաինան կհաղթի, քանի որ բարին միշտ հաղթում է չարին, մեզ դա սովորեցրել են դպրոցում»,- հայտարարել է Օլեգ Տինկովը։
Ապրիլի կեսերին Tinkoff Bank-ի հիմնադիրը Ուկրաինայի դեմ պատերազմն անվանել էր խելագարություն ու կոշտ արտահայտվել ռուսական բանակի մասին։
Այս շաբաթ New York Times-ին տված հարցազրույցում նա պատմել է, որ Instagram-ում հակապատերազմական գրառման հաջորդ օրը ՌԴ նախագահի աշխատակազմի պաշտոնյաները կապվել են բանկի ղեկավարության հետ և սպառնացել պետականացնել այն, եթե նրանք չխզեն հարաբերությունները Տինկովի հետ:
Տաթև Ֆռանգյան
