14.01.2026 | 10:17
Արարատ Միրզոյանի ասուլիսը Վաշինգտոնում. ՈՒՂԻՂ
Վրաերթի ենթարկված հղի կինը տեղում մահացել է․ հիվանդանոց է տեղափոխվել սրտի ու շնչառության կանգով․ Անատոլի Գնունի
Հասարակություն
26.04.2022 | 20:52
Կնոջը մահացած էին բերել՝ սրտի և շնչառության կանգով։ Այս մասին Factor.am-ին հայտնեց «Նաիրի» բժշկական կենտրոնի գործադիր տնօրեն Անատոլի Գնունին՝ անդրադառնալով Լեո-Պարոնյան փողոցների խաչմերուկում տեղի ունեցած վրաերթի դեպքին։
«Մենք փորձեցինք կատարել վերակենդանացման գործողություններ, որոնք արդեն ապարդյուն էին․ 1,5 ժամ պայքարեցինք կյանքի համար»,- ասաց նա՝ հաստատելով, որ կինը հղի էր։
Հիշեցնենք, որ այսօր՝ ժամը 18․24-ին, ոստիկանության օպերատիվ կառավարման կենտրոնում հաղորդում է ստացվել, որ Լեո-Պարոնյան փողոցների խաչմերուկի մոտ ամենագնացը վրաերթի է ենթարկել մի կնոջ։
«Նախնական տվյալներով՝ քաղաքացուհին վրաերթի է ենթարկվել Ճանապարհային ոստիկանության «Տոյոտա» մակնիշի ավտոմեքենայով, որը գտնվել է ծառայության մեջ։ Վրաերթի ենթարկվածը տեղափոխվել է «Նաիրի» բժշկական կենտրոն։ Հանգամանքները քննությամբ պարզվում են»,- ասվում է ոստիկանության հաղորդագրությունում։
Որոշ լրատվամիջոցների տեղեկացմամբ՝ ոստիկանության մեքենան վարչապետ Նիկոլ Փաշինյանին ուղեկցող ավտոշարասյունից է։ Այս տեղեկությունն առայժմ ո՛չ հաստատվել է, ո՛չ էլ հերքվել։ Մենք փորձում ենք կապ հաստատել վարչապետի աշխատակազմի հետ, սակայն՝ անարդյունք։
Արփի Հակոբյան
