Ոստիկանությունը հաստատեց․ Լեոյի փողոցում կնոջը վրաերթի ենթարկած «Տոյոտան» ծառայության մեջ է եղել

Այսօր՝ ժամը 18.20-ին, Պարոնյան-Լեո փողոցների խաչմերուկում ՃՏՊ է տեղի ունեցել, որից հետո հիվանդանոցից ահազանգ է ստացվել, որ վթարի հետևանքով  իրենց մոտ վնասվածքներով մի կին է տեղափոխվել։ Այս մասին Factor.am-ին հայտնեց ՀՀ ոստիկանության ԶԼՄ-ների հետ կապի բաժնի պետ Զարզանդ Գաբրիելյանը։

Նրա փոխանցմամբ՝ այժմ օպերատիվ քննչական խմբերը դեպքի վայրում են։ 

Ոստիկանությունը քիչ առաջ դեպքի վերաբերյալ նաև պաշտոնական հաղորդագրություն տարածեց։

«Այսօր՝ ժամը 18․24-ին, ոստիկանության օպերատիվ կառավարման կենտրոնում հաղորդում է ստացվել, որ Լեո-Պարոնյան փողոցների խաչմերուկի մոտ ամենագնացը վրաերթի է ենթարկել մի կնոջ։ Նախնական տվյալներով՝ քաղաքացուհին վրաերթի է ենթարկվել Ճանապարհային ոստիկանության «Տոյոտա» մակնիշի ավտոմեքենայով, որը գտնվել է ծառայության մեջ։ Վրաերթի ենթարկվածը տեղափոխվել է «Նաիրի» բժշկական կենտրոն։ Հանգամանքները քննությամբ պարզվում են»,- ասվում է հաղորդագրությունում։

Պատահարի մի քանի ականատեսներ պնդում են, որ տարածքում տեսախցիկները կարող են արձանագրած լինել վրաերթի պահը։ Նրանք նշում են նաև, որ կինը հղի է եղել։

Որոշ լրատվամիջոցների տեղեկացմամբ՝ ոստիկանության մեքենան վարչապետ Նիկոլ Փաշինյանին ուղեկցող ավտոշարասյունից է։ Այս տեղեկությունն առայժմ ո՛չ հաստատվել է, ո՛չ էլ հերքվել։ Մենք փորձում ենք կապ հաստատել վարչապետի աշխատակազմի հետ, սակայն՝ անարդյունք։

Factor.am-ը կապ հաստատեց նաև «Նաիրի» բժշկական կենտրոնի հետ՝ պարզելու վրաերթի ենթարկված կնոջ առողջական վիճակը, սակայն ԲԿ-ից նշեցին, որ որևէ տեղեկություն չեն կարող տրամադրել։ Մեր հստակեցնող հարցին, որ որոշ լրատվամիջոցներ հաղորդել են կնոջ հղի լինելու, ինչպես նաև նրա մահվան մասին, հաստատո՞ւմ են, թե՞ հերքում, ԲԿ-ից ասացին, որ չեն կարող տեղեկություն փոխանցել։ Հավելենք, որ հարակից շենքի բնակիչներից մեզ փոխանցեցին, որ վրաերթի ենթարկված կինը մահացել է։

Արփի Հակոբյան