Անկում՝ անշարժ գույքի ոլորտում․ աճ է գրանցվել միայն Երևանում

Այս տարվա մարտին հանրապետությունում անշարժ գույքի հետ կապված գործարքների թվի նվազում է գրանցվել։ Անշարժ գույքին առնվող գործարքների մեջ են մտնում օտարման, գրավադրման, ժառանգության, առաջնային գրանցման, վարձակալության, վերագրանցման և օրինականացման գործարքները։ Եթե նախորդ տարվա նույն ամսին հանրապետությունում գրանցվել է 17 567 գործարք, ապա այս տարի գործարքների թիվը 17 260 է։ Նվազումը կազմել է 1,7 %: Այս մասին տեղեկանում ենք Կադաստրի կոմիտեի հրապարակած տվյալներից։

Ամենամեծ թվով գործարքները՝ 5748, կատարվել են Երևանում։

Միայն օտարման գործարքները նախորդ տարվա նույն ամսվա համեմատ ավելացել են։  Եթե նախորդ տարվա մարտին 6563 օտարման (առքուվաճառք, նվիրատվություն, փոխանակում) գործարք է կատարվել, այս տարվա նույն ամսին գործարքների թիվը 6613 է եղել՝ 50-ով ավելի։ 

Առքուվաճառքի գործարքները նվազել են․ նախորդ տարվա մարտի 4883-ի փոխարեն այս տարի գրանցվել է 4859 գործարք։ 

Նշենք, որ մայրաքաղաքում, ի տարբերություն մարզերի, աճել  է անշարժ գույքի գործարքների թիվը։  Եթե նախորդ տարվա նույն ամսին կատարվել էր 5609 գործարք, այս տարի գործարքների թիվը 5749 է՝ 23,6 %-ով ավելի։ 

Ավելացել են նաև օտարերկրացի քաղաքացիների կողմից Հայաստանում անշարժ գույքի հետ կապված գործարքները։ 

2022 թ․ մարտին օտարերկրյա քաղաքացիները 140 միավոր անշարժ գույք են գնել՝ նախորդ տարվա նույն ամսվա 112-ի փոխարեն։ Ավելացել է նաև օտարերկյա քաղաքացիների կողմից վաճառքի գործարքների թիվը։ Այս տարվա մարտին օտարերկրյա քաղաքացիները Հայաստանում վաճառել են 300 միավոր անշարժ գույք՝ նախորդ տարվա նույն ամսվա 249-ի փոխարեն։ Նկատենք, որ, այնուամեյանիվ, օտարերկրյա քաղաքացիները Հայաստանում ավելի շատ վաճառում են անշարժ գույք, քան գնում։