16.01.2025 | 13:00
«Հայաստան-ԵՄ ռազմավարական գործընկերության խթանումը Վիշեգրադյան քառյակի փորձի հիման վրա». ՈՒՂԻՂ
Էրդողանի գործընկեր Բահչելին Կարո Փայլանին անվանել է «լրտես», իսկ Հայոց ցեղասպանության ճանաչման օրինագիծը՝ «ամոթալի»
Քաղաքականություն
26.04.2022 | 15:55
Թուրքիայի խորհրդարանի ընդդիմադիր քրդամետ Ժողովուրդների դեմոկրատական կուսակցության հայազգի պատգամավոր Կարո Փայլանի դեմ արշավը շարունակվում է՝ Հայոց ցեղասպանության ճանաչման մասին օրինագիծը օրենսդիր մարմնին ներկայացնելուց հետո։ Այս անգամ Փայլանին սպառնացել է Թուրքիայի նախագահ Ռեջեփ Թայիփ Էրդողանի կոալիցիոն գործընկեր, «Գորշ քայլերի» քաղաքական թև հանդիսացող «Ազգայնական շարժում» կուսակցության նախագահ Դևլեթ Բահչելին, գրում են թուրքական լրատվամիջոցները։
«HDP-ի ամբարտավանի կողմից ներկայացվել է, այսպես կոչված, Հայոց ցեղասպանության ճանաչման օրենքի առաջարկ։ Բարեբախտաբար, այդ ամոթալի օրինագիծը վերադարձվել է»,- ասել է Բահչելին։
Օրինագիծն անվանելով «խայտառակ առաջարկ»՝ Բահչելին նշել է, որ « Ազգային մեծ ժողովում սփյուռքի լրտես կա»։
«Սա ոչ մահմեդական փոքրամասնությունների համար մարտահրավեր նետելու վայր չէ»,- հայտարարել է Բաչելին։
Հիշեցնենք, որ Թուրքիայի խորհրդարանի նախագահ Մուսթաֆա Շենթոփը, որն իշխող «Արդարություն և զարգացում» կուսակցության անդամ է, հետ է վերադարձրել օրինագիծը՝ պնդելով, որ այն, իբր, դեմ է խորհրդարանի կանոնադրության դրույթներին։
«Նման առաջարկ ներկայացնելը կարող էր հնարավոր լինել Թուրքիայի սահմաններից դուրս գտնվող համարձակների աջակցությամբ։ Առաջարկը պետք է մերժվեր։ Այդպիսի վարքագիծը սադրանք է»,- ասել է Շենթոփը։
Էմմա Չոբանյան
