Քաղաքականություն
26.04.2022 | 14:57
Ընդդիմադիր ուժերի բողոքի ակցիաները մայրաքաղաք Երևանում և մարզերում շարունակվում են։ Այսօր Դաշնակցական երիտասարդները փակել են Կոմիտաս-Վաղարշյան խաչմերուկը: Նրանք նստել էին փողոցում և վանկարկում էին. «Առանց Նիկոլ Հայաստան»։ «Կոչ ենք անում վարորդներին՝ հանգցնեն մեքենաները և միանան մեր պայքարին, որովհետեւ մեր պայքարը հանուն Հայաստանի և Արցախի է: Արցախը երբեք չի լինելու Ադրբեջանի կազմում, մենք չենք թողնելու, որ Արցախը նվեր տան Ադրբեջանին, որ Հայաստանը դարձնեն Թուրքիայի վիլայեթ»,-ասում էին ակցիայի մասնակիցները:
Ընդդիմադիր երիտասարդները որոշ ժամանակով կաթվածահար են արել նաև Երևանի Կիևյան կամուրջը: Ոստիկանները հրելով դուրս են բերել ակցիայի մասնակիցներին փողոցից: Ի վերջո, հաջողվել է բացել ճանապարհը և վերականգնել երթևեկությունը: Ակցիայի մասնակիցների մի խումբ էլ ԵՊՀ-ում է եղել՝ կոչ անելով ուսանողներին միանալ իրենց պայքարին։
Մերի Մարտիրոսյան
