23.12.2024 | 22:31
Ինչպես են արձագանքել նախկին նախագահները Փաշինյանի բանավեճի հրավերին
ԵՄ-ի ֆինանսավորմամբ մեկնարկել է «UPSHIF-Գավառ և Իջևան» ծրագիրը․ ԼՈւՍԱՆԿԱՐՆԵՐ
Հասարակություն
25.04.2022 | 22:28
UPSHIF դեռահասների զարգացման և համայնքային ներգրավվածության խթանման համաշխարհային ծրագիրը, որը Հայաստանում առաջին անգամ ներդրվել է Գյումրիում՝ 2019 թվականին, այնուհետ իրագործվել Սպիտակում, մեկնարկեց նաև Գավառ ու Իջևան խոշորացված համայնքներում։
UPSHIF-ը նպատակ ունի փոխել 12-18 տարեկան պատանիների մտածողությունը, նրանց դարձնել մրցունակ, որոշում կայացնողներ, ներգրավել համայնքային խնդիրների լուծման գործում ու գաղափարները վերածել ձեռնարկատիրական գործունեության։
Ծրագիրն Հայաստանում իրականացվում է ՄԱԿ-ի «Յունիսեֆ» մանկական հիմնադրամի ու «Գյումրու երիտասարդական նախաձեռնությունների կենտրոն» ՀԿ-ի միջոցով։
ՄԱԿ-ի «Յունիսեֆ» մանկական հիմնադրամի երիտասարդների զարգացման ծրագրերի պատասխանատու Հասմիկ Ալեքսանյանը մեզ հետ զրույցում տեղեկացրեց, որ Գավառում և Իջևանում ծրագրի ֆինանսավորողը Եվրամիությունն է, որը 40-50 հազար դոլար է տրամադրել։ Ըստ նրա, երկու համայնքներից ընտրելու են 5 գաղափար ու յուրաքանչյուրի իրագործման համար տրամադրվելու է 120 հազարական դրամ։
«Գյումրու երիտասարդական նախաձեռնությունների կենտրոն» ՀԿ միջազգային խորհրդի նախագահ Արթուր Նաջարյանն էլ տեղեկացրեց, որ թվով 500 պատանիներ են մասնակցել Իջևան և Գավառ խոշորացված համայնքներում երիտասարդական համայնքային գաղափարների համար հայտարարված մրցույթին։ Նրանք այժմ 3-5 հոգանոց խմբեր են կազմել, ներկայացրել իրենց համայնքային խնդիրները՝ մատնանշելով լուծման ուղիները։ Ժյուրի գնահատման վերջնարդյունքում յուրաքանչյուր համայնքից կընտրվեն 5 գաղափարներ, որոնք, ֆինանսական աջակցություն ստանալով, մինչև օգոստոս ամիս կյանքի կկոչվեն։
Մեր զրուցակիցը նշեց, որ Գավառում և Իջևանում գաղափարներն առանձնահատուկ են, եթե նախորդ տարիներին պատանիները հիմնականում ուշադրություն են դարձրել բանապահպանական խնդիրներին, այս դեպքում հստակ բիզնես-գաղափարներ են ներկայացրել, որոնք ուղղված են զբոսաշրջության զարգացմանը, զբաղվածության չունեցող կանանց համար աշխատատեղերի ստեղծմանը։ Արթուր Նաջարյանի բնութագրմամբ՝ այս տարի նորարական մոտեցումներն ավելի շատ են։
Նա, մեջբերելով Գյումրիում ու Սպիտակում իրականցված UPSHIF ծրագիրը, փաստեց, որ որոշ գաղափարներ վերածվել են ձեռնարկատիրական գործունեության։
Սպիտակում պատանիները էկո-գրիչներ են արտադրում ու վաճառում տարբեր անհատների ու կառույցների։ Ստացված հասույթն էլ, ըստ նրա, օգտագործվում է համայնքային զբոսայգում նստարանների տեղադրման նպատակով։ Կայուն բիզնեսի է վերածվել նաև Էկո-պայուսակների արտադրությունը, որը սկսվել էր Գյումրիում։ Պատանիները իրենց արտադրանքը վաճառում են խանութներին, պահանջարկը մեծացել է հատկապես վերջերս, երբ մինչև 50 միկրոն հաստությամբ պոլիէթիլենային տոպրակների օգտագործումն արգելվել է։
ՄԱԿ-ի «Յունիսեֆ» մանկական հիմնադրամի երիտասարդների զարգացման ծրագրերի պատասխանատու Հասմիկ Ալեքսանյանն էլ նշում է, որ համայնքային կյանքը փորձում են փոխել հենց երիտասարդների միջոցով։ Նա նաև փաստում է, որ իրենց ծրագրին մասնակցած պատանիներից շատերը մասնակցում են ավագանու նիստերի՝ օգնելով որոշումների կայացմանը։
Հասմիկ Ալեքսանյանը հույս է հայտնում, որ UPSHIF-ը հաջորդիվ կիրականացվի Սյունիքում։
Արմիկ Մովսիսյան
