23.04.2026 | 14:25
Դիլիջանում կասեցվել է լիմոնադի և շշալցված ջրերի արտադրամասի արտադրական գործունեությունը
Թուրք ընդդիմադիր պատգամավորի դեմ Հայոց ցեղասպանության մասին գրառման համար Անկարայում հետաքննություն է սկսվել
Քաղաքականություն
25.04.2022 | 19:40
Անկարայի Գլխավոր դատախազությունը հետաքննություն է սկսել գլխավոր ընդդիմադիր Ժողովրդահանրապետական կուսակցության պատգամավոր Սեզգին Թանրըքուլուի դեմ՝ սոցիալական ցանցերում Հայոց ցեղասպանության մասին գրառման համար, հայտնում են թուրքական լրատվամիջոցները։
Հաղորդվում է, որ հետաքննությունը սկսվել է Թուրքիայի քրեական օրենսգրքի 301-րդ հոդվածի համաձայն՝ «թուրք ազգին և Թուրքիայի Հանրապետությունը վիրավորելու» մեղադրանքով։ Դատախազությունը հետաքննություն է սկսել պատգամավորի դեմ, քանի որ «կոնկրետ ապացույցներ կան, որ Թանրըքուլուն վիրավորել է Թուրքիայի Հանրապետություն իրավաբանական անձին»։
Ապրիլի 24-ին թուրք ընդդիմադիր պատգամավորը թվիթերյան իր էջում գրել էր․ «107 տարի առաջ՝ 1915 թվականի ապրիլի 24-ին, հարյուրավոր հայ մտավորականներ Ստամբուլում ձերբակալվեցին, աքսորվեցին Չանքըրը, Այաշ, Անկարա և բռնի անհետացան։ Առանց առերեսվելու այս ամսաթվին, որը չարիքի սկիզբն է, հնարավոր չէ իսկական արդարության հասնել»,- գրել էր պատգամավորը՝ գրառմանը կից հրապարակելով Հայոց ցեղասպանության զոհ դարձած հայ մտավորականների ու անմոռուկի լուսանկարը։
Թանրըքուլուի այս գրառումը բուռն արձագանք է առաջացրել սոցցանցերում։ Թուրք օգտատերերն ու տարբեր գործիչներ սկսել են մեղադրանքներ հնչեցնել պատգամավորի հասցեին։
Էմմա Չոբանյան
