08.06.2026 | 23:12
Երևանի և 8 մարզի մի շարք հասցեներում էլեկտրաէներգիաայի անջատումներ կլինեն
ՆԱՏՕ-ի բաց դռների քաղաքականությունը Վրաստանի նկատմամբ մնացել է անփոփոխ
Քաղաքականություն
20.04.2022 | 18:41
ՆԱՏՕ-ի բաց դռների քաղաքականությունը Վրաստանի նկատմամբ մնացել է անփոփոխ։ Այս մասին Թբիլիսիում հայտարարել է Հյուսիսատլանտյան դաշինքի գլխավոր քարտուղարի օգնականի տեղակալ Ջեյմս Ապաթուրայը, գրում է DW-ի ռուսական ծառայությունը։
Նա նշել է, որ ՆԱՏՕ-ն Վրաստանը համարում է իր «ամենամոտ գործընկերներից» մեկը, և որ ինքը Թբիլիսիում է՝ քննարկելու հետագա համագործակցության գործնական քայլերը։
«Ռուսաստանը դարձել է ավելի ագրեսիվ և վտանգավոր, մենք պետք է ավելի ակտիվորեն աջակցենք մեր գործընկերներին»,- ասել է Յենս Ստոլտենբերգի օգնականը՝ հավելելով, որ «անվտանգության իրավիճակը վատթարացել է»։
Ջեյմս Ապաթուրայը վստահություն է հայտնել, որ ՆԱՏՕ-ի առաջնորդները հունիսի վերջին Մադրիդում կայանալիք գագաթնաժողովում կվերահաստատեն դաշինքի հավատարմությունը բաց դռների քաղաքականությանը։
«Վրաստանը ևս կհիշատակվի»,- ընդգծել է նա։
ՆԱՏՕ-ի գլխավոր քարտուղարի օգնականի տեղակալը նաև նշել է, որ Վրաստանը պետք է ուժեղացնի կիբերանվտանգությունը։
Հյուսիսատլանտյան դաշինքի երկրների պետությունների և կառավարությունների ղեկավարների հաջորդ գագաթնաժողովը նախատեսված է հունիսի 29-30-ը։ Ապաթուրայը նախկինում աշխատել է Հարավային Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ:
Տաթև Ֆռանգյան
