20.08.2026 | 23:01
«Նոան» նոր գլխավոր մարզիչ ունի
Թուրքիան նոր լայնածավալ ռազմական գործողություն է սկսել Իրաքի Քուրդիստանում
Քաղաքականություն
18.04.2022 | 13:12
Թուրքական բանակը Իրաքի հյուսիսում Քուրդիստանի շրջանում նոր ռազմական գործողություն է սկսել, գրում է «Անադոլու» գործակալությունը։
Նշվում է, որ գործողությունը, իբր, սկսվել է Քրդական աշխատավորական կուսակցության (PKK) դեմ։
Ռազմական գործողության մեկնարկի մասին, որը կրում է Pençe Kilit ծածկանունը, հայտարարել է Թուրքիայի պաշտպանության նախարար Հուլուսի Աքարը Թուրքիայի ռազմաօդային ուժերի օպերատիվ շտաբ այցի ժամանակ։
Աքարը հայտարարել է, որ գործողությունն ընդգրկում է Իրաքի երեք շրջան՝ Մետինա, Զապ և Ավաշին-Բասյան, և անցկացվում է ավիացիայի ակտիվ աջակցությամբ։ Նա նշել է, որ հզոր ավիահարվածներ են հասցվել այդ շրջաններում, հատուկ նշանակության ջոկատներն իջեցվել են Իրաքի հյուսիսում ATAK հարվածային ուղղաթիռների և անօդաչու թռչող սարքերի աջակցությամբ:
«Գործողությունը հաջողությամբ շարունակվում է։ Առաջին փուլի շրջանակում ապահովվել է վերահսկողություն բոլոր նախատեսված թիրախների նկատմամբ»,- ասել է Աքարը։
Նա նաև ասել է, որ Թուրքիան, իբր, հարգում է Իրաքի ինքնիշխանությունն ու տարածքային ամբողջականությունը, իսկ թուրքական բոլոր գործողություններն ուղղված են «տարածաշրջանում ահաբեկչության սպառնալիքի վերացմանը»։
Էմմա Չոբանյան
