12.01.2025 | 11:41
Հրդեհ՝ Հյուսիսային պողոտայի սուպերմարկետներից մեկի պահեստային հատվածում
Ալեն Սիմոնյանը խուսափեց Միրզոյան-Բայրամով հեռախոսազրույցից խոսել, փոխարենը քննադատեց լրագրողներին․ ՏԵՍԱՆՅՈՒԹ
Քաղաքականություն
12.04.2022 | 14:25
Ազգային ժողովի նախագահ Ալեն Սիմոնյանը լրագրողների հետ ճեպազրույցում խուսափեց Միրզոյան-Բայրամով հեռախոսազրույցից խոսել, փոխարենը քննադատեց լրագրողներին:
«Պատսպարվելով խոսքի ազատության և ԶԼՄ-ների մասին օրենքով՝ լրագրողները հաճախ իրենց շատ վատ են պահում: Այդ հարցով, կարծում եմ, մենք պետք է որոշում կայացնենք և որևիցե ձևով կարգավորենք լրագրողների գործունեությունը, որովհետև իրար ընդհատելով, իրար վիրավորելով, մարդկանց հետապնդելով, դա որպես լրագրություն ներկայացնելը, կարծում եմ՝ ճիշտ չէ»,- նշեց Սիմոնյանը։
Լրագրողի հարցին՝ արդյո՞ք պատգամավորներն իրենց լավ են պահում, Ալեն Սիմոնյանն արձագանքեց, թե պատգամավորների գնահատականը տալիս են ընտրողները. «Նրանք ուղիղ ընտրվող մարդիկ են: Պատգամավորի գործունեության հետ կապված օրենքը հստակ է: Եթե այլ բան է պետք անել, դրա մասին խոսում են պատգամավորները և ժողովուրդը քվե է տալիս»:
«Այ այսպիսի վարվելակերպը նաև ՀՀ քաղաքացիներին է ջղայնացնում, դրանով դուք վատ վերաբերմունք եք ձևավորում մարդկանց մոտ լրագրողների նկատմամբ: Դուք, լրագրողներդ ճիշտ կանեք, եթե հավաքվեք միասին, ես կարող եմ դրան աջակցել, և որոշեք, թե ինչ վարքագծի կանոններ պետք է լինեն, որ դուք առնվազն իրար չընդհատեք, իրար հետ չվիճեք, որ լրագրողը ֆեյսբուքի իր էջում հրապարակային վիրավորանքներ չգրի, որ ԱԺ-ում իրար չվիրավորեն և կռիվներ չլինեն։ Հավաքվեք, կանոններ մշակեք, հակառակ պարագայում կբախվեք ներսում մշակված կանոնների հետ և ստիպված կլինեք ենթարկվել»,- ասաց Ալեն Սիմոնյանը:
Անդրադառնալով լրագրողներից մեկի դիտարկմանը, թե Փաշինյանի պատճառով է, որ լրագրողների մասին կա այդպիսի վերաբերմունք, քանի որ նա էլ է լրագրող, Ալեն Սիմոնյանն արձագանքեց. «…Երկակի ստանդարտներ պետք չեն։ Հավաքվեք, կանոններ մշակեք, հակառակ պարագայում կբախվեք ներսում մշակված կանոնների հետ»:
Մանրամասները՝ տեսանյութում:
