17.01.2026 | 18:34
Մահացել է դերասանուհի Զառա Արամյանը
Հայաստանի իշխանությունը միայնակ է թողել Արցախը. Հայկ Մամիջանյան․ ՏԵՍԱՆՅՈՒԹ
Քաղաքականություն
12.04.2022 | 11:30
«Հայաստանի իշխանությունը միայնակ է թողել Արցախը՝ չայցելելով Արցախ: Մենք Արցախը միայնակ չենք թողնում, Արցախը մեր հայրենիքն է, և ամեն ինչ կանենք, որ Արցախը չհայտնվի Ադրբեջանի կազմում»,- խորհրդարանում լրագրողների հետ զրույցում հայտարարեց «Պատիվ ունեմ» խմբակցության քարտուղար Հայկ Մամիջանյանը՝ անդրադառնալով ընդդիմադիր պատգամավորների հայտարարությանը, որ բոյկոտում են ԱԺ նիստերը և մեկնում են Արցախ:
Անդրադառնալով Արցախի դրոշը Հայաստանի տարբեր քաղաքներում և համայնքներում տեղադրելու վերաբերյալ քննադատություններին՝ Մամիջանյանը նշեց. «Արցախի դրոշն ինքն իրենով դարձել է Հայաստանի արժանապատվությունը վերադարձնող շարժման սիմվոլ, այն արդեն իսկ ծածանվում է Հայաստանի տարբեր մարզկենտրոններում, մեծ ու փոքր քաղաքներում»:
Պատգամավորը հավելեց, որ Արցախի դրոշը պայքարի սիմվոլն է և ոչ բուն պայքար. «Թող այս իշխանությունները մտածեն՝ էդ ի՞նչ Հայաստան են սարքել, որ հարց է՝ արդյոք կհաջողվի այս կամ այն քաղաքում Արցախի դրոշ տեղադրել, թե չէ: Թող մտածեն՝ այդ ի՞նչ Հայաստան են կառուցել, որ Հայաստանի այս կամ այն քաղաքում Արցախի դրոշ տեղադրելը ձեռքբերում կարող է դիտարկվել: Բնականաբար պայքարը դրոշի շուրջ լինել չի կարող, դա ընդամենը խորհրդանիշ է»:
Արձագանքելով իշխանության հայտարարություններին, թե Արցախ այցելելով՝ ընդդիմադիրները վտանգում են Արցախի քաղաքացիներին՝ Մամիջանյանը նշեց. «Արցախը վտանգվում է սրանց գոյությամբ, իշխանության մոտ իրենց լինելով, որ իրենց, այսպես կոչված, խաղաղության դարաշրջանի արշալույսին ավելի շատ զոհեր, գերիներ ու տարածքային կորուստներ են լինում, քան մինչ այդ՝ 30 տարվա ընթացքում»։
Մանրամասները՝ տեսանյութում:
