18.12.2025 | 22:20
Վթար Ներքին Դվին գյուղում․ կան տուժածներ
Շահումով խաղեր խաղալու մեջ անչափահասների մեծ ներգրավվածություն կա. Ծովինար Վարդանյան․ ՏԵՍԱՆՅՈՒԹ
Հասարակություն
11.04.2022 | 12:21
Ֆինանսավարկային և բյուջետային հարցերի մշտական հանձնաժողովի նիստում քննարկվում է «Շահումով խաղերի, ինտերնետ շահումով խաղերի և խաղատների մասին» օրենքում փոփոխություն կատարելու մասին, «Վիճակախաղերի մասին» օրենքում փոփոխություն կատարելու մասին ՀՀ քաղաքացիական օրենսգրքում փոփոխություն կատարելու մասին օրենքի նախագիծը։
Բուքմեյքերական հաշիվներն այսօր հնարավոր է լիցքավորել 3 եղանակով, կանխիկ, բանկային քարտից և էլեկտրոնային դրամապանակից։
Նախագծով առաջարկվում է օրենքն ընդունելուց 10 օր հետո հանել բուքմեյքերական հաշիվը կանխիկ ձևով լիցքավորելու տարբերակը։ Այնուհետև 6 ամիս հետո հնարավոր չի լինելու նաև էլեկտրոնային դրամապանակներից լիցքավորել բուքմեյքերական հաշիվները։ Այսինքն՝ օրենքն ընդունելուց 6 ամիս 10 օր հետո քաղաքացիներն իրենց բուքմեյքերական հաշիվները կարող են լիցքավորել միայն անկանխիկ եղանակով:
«Հայաստան» խմբակցության պատգամավոր Արծվիկ Մինասյանը ներկայացրեց վիճակագրական տվյալներ՝ ընդգծելով, որ շահումով խաղեր խաղացողների թիվը 2018-2020 թթ. ընթացքում 18.093-ից դարձել է 44.082, ինչը, ըստ պատգամավորի, բավականին մտահոգիչ և սարսափելի ցուցանիշ է:
Նախագծի համահեղինակ Ծովինար Վարդանյանն արձագանքեց՝ նշելով, որ 2018 թվականից խաղացողների թվի աճը պայմանավորված է նաև նրանով, որ մարդկանց մեծ մասը սկսել է սոցիալական հարթակներում ժամանակ անցկացնել, նաև դեր է խաղացել բուքմեյքերական գրասենյակների փակումը: «Նախկինում, երբ ֆիզիկապես այցելում էին բուքմեյքերական գրասենյակ, մեկ օգտահաշվից բազմաթիվ քաղաքացիներ էին մուտք անում և խաղադրույքներ կատարում»,- նշեց Վարդանյանը:
Պատգամավորն ընդգծեց, որ շահումով խաղեր խաղալու մեջ անչափահասների մեծ ներգրավվածություն կա, քանի որ նրանք զարտուղի ճանապարհներով օգտահաշիվներ են բացում, և վստահեցրեց, որ նոր նախագիծը կանխարգելող նշանակություն կունենա. «Երբ խաղադրույքների կատարումը բանկային համակարգի միջոցով լինի, այս հարցը կփակվի»:
Մանրամասները՝ տեսանյութում:
