ՌԴ-ն Հայաստանում կավելացնի ռուսական դպրոցների թիվը․ Լավրով. ՏԵՍԱՆՅՈՒԹ

«Ապրիլի 3-ին լրացել է Հայաստանի և Ռուսաստանի միջև դիվանագիտական հարաբերությունների հաստատման 30-ամյակը, այս տարի լրանում է նաև համագործակցության  և փոխադարձ օգնության մասին պայմանագրի կնքման 25-ամյակը: Սա նշանակալի տարեթիվ է՝ մեր դաշնակցության, ռազմավարական գործընկերության համար: Հոբելյանին նվիրված միջոցառումների աշխատանքները հետևողականորեն իրականացվում են»,- այս մասին ասաց ՌԴ արտաքին գործերի նախարար Սերգեյ Լավրովը ՀՀ ԱԳ նախարարի հետ ճեպազրույցի ընթացքում:

ՌԴ ԱԳ նախարարն ընդգծեց նաև Հայաստանի վարչապետի և Ռուսաստանի նախագահի միջև առկա վստահելի, կանոնավոր քաղաքական երկխոսության մասին:

«Ռուսաստանը շարունակում է մնալ Հայաստանի առաջատար առևտրային գործընկերը: Արտաքին առևտրում մեր մասնաբաժինը գերազանցում է 30 տոկոսը:

Անկումից հետո, որը գրանցվել էր կորոնավիրուսի պատճառով, հաջողվել է ապրանքաշրջանառությունը վերադարձնել կայուն աճի: Անցյալ տարի այն կազմել է ավելի քան  2 մլրդ 600 մլն դոլար»,- նշեց ՌԴ ԱԳ նախարարը:

Ըստ Լավրովի՝ երկու երկրները կխորացնեն համագործակցությունը նաև մշակույթի, կրթության, զբոսաշրջության, սպորտի և այլ ոլորտներում:

«Ընթացիկ տարում պլանավորում ենք Երևանում տեղադրել հայ-ռուսական բարեկամության հուշարձան»,-ասաց ՌԴ ԱԳ նախարարը:

Նրա խոսքով՝ օրակարգում են Ռուսաստանում Հայաստանի մշակույթի օրերի անցկացում, իսկ Հայաստանում կանցկացվեն Ռուսաստանի հոգևոր մշակույթի օրեր: Ռուսաստանն աջակցում է նաև Հայաստանում ռուսական դպրոցների թվի ավելացմանը:

Մանրամասները՝ տեսանյութում: