Բաքուն Փաշինյան-Միշել-Ալիև հանդիպման արդյունքների մասին սեփական տեսակետն է ներկայացրել

Ադրբեջանի ԱԳՆ-ն հայտարարություն է տարածել նախօրիեն Բրյուսելում կայացած ՀՀ վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի եռակողմ հանդիպման մասին։

«Այս հանդիպումը 2021 թվականի դեկտեմբերի 15-ին կայացած հանդիպման շարունակությունն է և նվիրված էր տարածաշրջանում ստեղծված իրավիճակի, այդ թվում՝ տարածաշրջանի անվտանգ, կայուն և խաղաղ զարգացման հարցերի քննարկմանը»,- ասվում է ԱԳՆ հայտարարության մեջ։

Ադրբեջանական կողմը, հիմնվելով ԵՄ Խորհրդի նախագահ Շառլ Միշելի հայտարարության վրա, քննարկման թեմաներն ու արդյունքները ներկայացրել է Բաքվի տեսակետից՝ նշելով, որ «գործընթացը գնում է միայն հօգուտ Ադրբեջանի»։

Հանդիպմանը ըստ ադրբեջանական կողմի, լայնորեն քննարկվել են այն սկզբունքները, որոնք Բաքուն «հետևողականորեն պաշտպանում է հետկոնֆլիկտային փուլում տարածաշրջանի զարգացման հետ կապված», այդ թվում՝ 2020 թվականի նոյեմբերի 9/10-ի եռակողմ հայտարարության դրույթների լիարժեք պահպանումը, կողմերի միջև խաղաղության և վստահության խթանմանն ուղղված մարդասիրական քայլերի շարունակությունը, երկու պետությունների սահմանների սահմանազատման կոնկրետ գործողություններ, տրանսպորտային հաղորդակցությունների բացումը։

«Երկու երկրների արտգործնախարարներին հանձնարարվել է սկսել խաղաղ համաձայնագրի նախապատրաստումը Ադրբեջանի կողմից առաջ քաշած նախաձեռնության և Ադրբեջանի կողմից ներկայացված հիմնարար սկզբունքների հիման վրա։ Ընդգծվել է երկու պետությունների միջև սահմանի դեմարկացիայի ու դելիմիտացիայի կարևորությունը, մասնավորապես, պայմանավորվածություն է ձեռք բերվել մինչև այս տարվա ապրիլի վերջ Սահմանային համատեղ հանձնաժողով ստեղծելու մասին»,- ասվում է հայտարարության մեջ։
Ադրբեջանի ԱԳՆ-ն նշում է նաև, թե «բրյուսելյան հանդիպումը հերթական կարևոր քայլն է ի շահ Ադրբեջանի»։

Էմմա Չոբանյան