17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
Ժաննա Անդրեասյանն այցելել է Տավուշ` դիտարկելու Հանրակրթության պետական չափորոշչի փորձարկման ընթացքը
Հասարակություն
04.04.2022 | 15:47
ՀՀ Տավուշի մարզի հանրակրթական ուսումնական հաստատություններում Հանրակրթության պետական չափորոշչի փորձարկման ընթացքը դիտարկելու նպատակով ՀՀ կրթության, գիտության, մշակույթի և սպորտի նախարարի տեղակալ Ժաննա Անդրեասյանն աշխատանքային երկօրյա այցով գտնվել է Տավուշի մարզում. տեղեկացնում են ԿԳՄՍՆ-ից։
Մոնիթորինգային խմբի հետ Տավուշ են մեկնել նաև ԿԳՄՍ նախարարության հանրակրթության վարչության պետ Արսեն Բաղդասարյանը, հանրակրթության և արտադպրոցական ծրագրերի մշակման և իրականացման բաժնի պետ Սուսաննա Ազատյանը, Կրթության զարգացման և նորարարությունների ազգային կենտրոնի (ԿԶՆԱԿ) տնօրենի պաշտոնակատար Արտաշես Թորոսյանը։
Դիտարկումը կատարվել է Նոյեմբերյանի և Բերդի տարածաշրջանների հանրակրթական ուսումնական հաստատությունների 2-րդ, 5-րդ, 7-րդ և 10-րդ դասարաններում` հաշվի առնելով այն, որ նոր չափորոշիչը փորձարկվում է նշված դասարաններում:
Աշխատանքային խումբը իրականացրել է դասալսումներ՝ հստակեցնելու, թե ուսուցիչը դասապրոցեսի ընթացքում ինչպես է կիրառում նոր չափորոշչի պահանջները: Այցի շրջանակում տեղի են ունեցել նաև հանդիպումներ ուսումնական հաստատությունների տնօրենների, տնօրենի տեղակալների և ուսուցիչների հետ, վերջիններս բարձրացրել են իրենց հուզող հարցերը և խնդիրները: Քննարկումների ընթացքում փորձարկվող դասարաններում դասավանդող ուսուցիչները նշել են, որ Հանրակրթության նոր չափորոշչով աշխատելն արդեն որոշակի դրական արդյունք է ապահովել` սովորողների շրջանում ձևավորելով այնպիսի կարողություններ և ունակություններ, որոնք առաջնային են անձի ձևավորման և կայացման գործում։
Ուսուցիչները նաև նշել են, որ նոր մեթոդներով աշխատելն իրենց հնարավորություն է ընձեռում ավելի ազատ ու անկաշկանդ դասավանդելու` դրսևորելով ստեղծագործ մոտեցումներ:
Ուսուցիչները իրենց գոհունակությունն են հայտնել «ԿԶՆԱԿ» հիմնադրամին շարունակական աջակցության համար:
Մատնանշվել են նաև չափորոշչի փորձարկման ընթացքում ի հայտ եկած խնդիրները:
