20.11.2024 | 21:38
Վրաստանի ԿԸՀ-ն պատրաստվում է պատգամավորական վկայականներ հանձնել նորընտիր պատգամավորներին
Ֆրանսիան 500 հազար դոլար դրամաշնորհ է հատկացրել Վրաստանին՝ երկաթգծի բարելավման համար
Քաղաքականություն
04.04.2022 | 15:39
Զարգացման ֆրանսիական գործակալությունը (AFD) 500 հազար դոլար դրամաշնորհ է հատկացրել Վրաստանի երկաթուղուն։ Այս մասին հայտնում է Պետական երկաթուղու մամուլի ծառայությունը, գրում է newsgeorgia.ge-ն։
Տեխնիկական աջակցության նպատակն է` նպաստել Վրաստանում երկաթուղային տրանսպորտի կայուն զարգացմանը և աջակցել ոլորտի ներդաշնակեցմանը ԵՄ կանոններին։ Նշվում է, որ Վրաստանում բեռնափոխադրումների շուկան ընդլայնելու նպատակով համագործակցության շրջանակում կպատրաստվի երկաթուղային քաղաքականության ազգային փաստաթուղթ և ներդրումային պլան, այդ թվում՝ շարժակազմի համար։
Նախադրված նպատակներին հասնելու համար AFD-ի առաջարկությամբ Վրաստան կժամանի ֆրանսիացի փորձագետ, որը խորհրդակցություններ կանցկացնի Վրաստանի երկաթուղու և պաշտոնական այլ կառույցների ներկայացուցիչների հետ։ Առաքելությունը կմեկնարկի ապրիլին և կտևի 12-18 ամիս։
Վրացական երկաթուղին Արևելք-Արևմուտք տրանսպորտային միջանցքի անբաժանելի մասն է։ Երկրի երկաթուղիների շահագործման երկարությունը 1324 կմ է։ Համակարգն ունի 45 թունել, 1714 կամուրջ, լաստանավային անցումներ Ռուսաստանի և Ուկրաինայի հետ։
Տաթև Ֆռանգյան
