Ալեն Սիմոնյանի՝ ԱԺ նախագահի պաշտոնում ընտրվելու սահմանադրականության հարցը կրկին կքննվի դռնփակ

Սահմանադրական դատարանը որոշում է կայացրել կրկին փոխել ԱԺ նախագահ Ալեն Սիմոնյանի ընտրության վերաբերյալ որոշման սահմանադրականությունը որոշելու հարցի քննության ընթացակարգը։ ՍԴ նոր որոշման համաձայն՝ դատաքննությունը կանցկացվի գրավոր ընթացակարգով՝ դռնփակ։ Այս մասին Factor.am-ը տեղեկանում է ՍԴ պաշտոնական կայքից։

«Նկատի ունենալով գործի դատաքննության բանավոր ընթացակարգից գրավոր ընթացակարգի անցնելու վերաբերյալ առաջարկությունը և հաշվի առնելով, որ նշված գործի դատաքննությունը բանավոր ընթացակարգով անցկացնելու հիմքերը վերացել են՝ դատաքննությունը բանավոր ընթացակարգից կանցկացվի գրավոր»,- նշված է ՍԴ որոշման մեջ։

Հիշեցնենք՝ ի սկզբանե դատաքննությունը նախատեսված էր գրավոր ընթացակարգով, այսինքն` հարցի քննարկումն իրականցվելու էր դռնփակ: Սակայն տարեսկզբին Սահմանադրական դատարանը որոշում էր կայացրել անցնել բանավոր ընթացակարգի, ուստի հունվարի 25-ին նախատեսված առաջին նիստը հետաձգվել էր՝ կողմերի թերի պատրաստվածության հիմքով․ պատասխանող կողմը՝ Ազգային ժողովի ներկայացուցիչը ՍԴ դիմում էր ներկայացրել նիստը հետաձգելու մասին, նշելով, որ բանավոր ընթացակարգն իրենից առավել մեծածավալ աշխատանք է նախատեսում, ինչը կատարելու խնդիր ունեն։ Միջնորդությունը բավարարվել էր և հերթական նիստը նշանակվել ապրիլի 5-ին։

Թե որն է եղել պատճառը կամ ում առաջարկությամբ է ՍԴ-ն կրկին որոշել դռնփակ գրավոր ընթացակարգի անցնել, Բարձր դատարանը չի մեկնաբանում։

Հիշեցնենք՝ օգոստոսի 3-ին Ազգային ժողովում «Հայաստան» և «Պատիվ ունեմ» խմբակցությունները հայտարարել էին, որ Ալեն Սիմոնյանի՝ ԱԺ նախագահ ընտրվելը հակասահմանադրական է: Ընդդիմադիրները որպես պատճառաբանություն նշում էին այն, որ իրենց առաջադրած թեկնածուները կալանավայրում են, ինչն անհավասար պայմաններ է ստեղծել:

Ռոզա Վարդանյան